《小克局部展》展出的作品，其實局部得來幾全面，由95年至08年101幅精華畫作全部上榜，從《小明周》到《東Touch》年代都有涵蓋。一次過睇晒小克份人有幾「憤青」，有時癲喪無聊改歌詞，又可以sweet談愛情，今回仲真係殺出咗西九，直入沙田體藝中學，踩入學界！
記者︰黃家欣
攝影︰陳盛臣
幻想天花板畫展
從公司出發轉了好幾程車才到體藝中學，以小克的號召力，開畫展為何要咁偏僻，實情是只有體藝中學才打動到小克，將原稿拿出來，作首次公開展覽。「去年體藝的miss謝問我有沒有想過辦展覽，其實我本來打算臨死才來個『晒冷』展。不過覺得在學校搞展覽很有意思。」學校畫廊陳設簡單，原稿沒有裝裱便貼到展板上，原來也是小克之意，「既然來學校搞展覽，便不用太複雜，簡簡單單，就好似細個貼堂一樣。」為甚麼叫《局部展》？「因為真係好局部！我原本幻想同阿德一齊搞個全展，將所有畫作由牆貼到上天花板，但呢個真係一個幻想，而今次就揀了精華的101幅原稿出來！」與阿德合辦展覽是小克的心願，他在專欄寫道︰「佢（阿德）嘅畫太鹹濕入唔到中學，我嘅畫又唔夠藝術入唔到Hulahoop（《阿德狂草展》地點）……」講笑咋嘛！
聾貓VS維港巨星
今次展出小克逾10年的作品，當然少不了「聾貓」，那段《貓巴士》漫畫在email裏回傳了七、八次，聾貓得人心是事實，但小克就曾講過聾貓不是他最愛，「我現在想，當時咁講係唔啱，我的專欄其實反映心情，有時睇完報紙想鬧政府，便畫維港巨星，但人總不能下下咁憤怒，有時都會諗啲開心嘅，《聾貓》其實代表我另一面，不能說不喜歡。」朋友睇無厘頭《聾貓》、改歌詞的《如果菜》笑到標眼淚，但小克本人並非爛gag王，一提灣仔舊區、維港規劃時，甚至有點「憤青」，「都係一招拋磚引玉，香港人口味要cutie、易食，《聾貓》吸引到讀者，」但始終《維港巨星》最令他感受良多，「維港問題好多人都寫過，胡恩威、陳冠中、龍應台，他們甚至提議政府要點做。我無方法去解決，但又覺得好嬲，於是將兒時幻想維港旁的大廈變成機械人畫出來，等中學、大學生讀者都思考一下這個問題。」今次展覽海報也用維港巨星做主角，可見其地位幾咁重要。
最憎finefinish
時而搞gag，時而認真，連自己也不知怎樣編排展覽的作品，索性叫學校隨意貼。題材分裂得緊要，風格亦多變，有時兩版專欄竟寫滿字，「我本身鍾意寫字多過畫畫，只係較擅長用畫畫表達自己。有次諗起以前畫水彩的事，畫面交代唔到，所以便寫字。我覺得電腦的中文字款選擇少，所以便自己寫，其實字都係畫面一部份，我都知有時要睇得辛苦，亦有人唔鍾意睇咁多字，但無理由遷就讀者，唔鍾意就唔好睇呢篇囉，我無所謂！」體藝中學的謝老師最欣賞小克作品中的留白讓讀者有更大思考空間，「讀書時流行咁樣的美學標準，95年電影《七宗罪》的opening簡直就實現了我們的理想，那種freehand、raw、collage、用鉛筆捽到一撻撻的畫面，於是我們都學了這一套。我好憎finefinish，有句話︰『完成是破壞的開始』。要畫到一模一樣，點解唔影相呢？我覺得未畫完係最靚的。」
漫畫．教育．講座
今次還會舉行一場講座，同教師交流心得，曾在Poly任教3年，小克知道藝術教育的艱難，「我的學生年代，每個學期都要交一本sketchbook，題材不限，因為要交功課，自然畫得多，𠵱家無咗呢啲習作，學生都唔多識畫嘢。」家長的心態又係另一難搞問題，謝老師也深表認同，「家長唔重視學生藝術方面的發展，認為要專注學業，術科就不必『浪費』太多時間。」小克話香港做漫畫家絕不會發達，「香港市場太小，我本書06年出版，目前只賣到一萬書左右，版稅太少根本無法維生，唔同美國，淨係賣幾個state都有一萬書啦！」香港生活費高昂，小克最近被「逼遷」到杭州居住，不過記者粗略數過，單是今年小克畫的廣告插畫、與商場的合作已不止十個project，北上應該是為尋找優質生活而已。
小克局部展
日期：即日至10月25日
地點：火炭樂景街5號沙田賽馬會體藝中學
查詢：26917150 內線8129（謝老師）