除咗賭王講大市，褲王楊釗亦湊熱鬧話：「海嘯咪去滑浪囉！」好多人見個市跌到殘，心郁郁想撈底，佢就話，咁等如「拋空接飛刀」──好難！接到都好易損手，所以要睇有冇膽識同技術，楊釗仲好謙咁話：「我冇咁嘅技術，亦都冇膽量。」又話呢個時候賺到錢，心理壓力都好大。梗係啦，個市咁波動，嚇都嚇儍。
賺10億好濕碎
楊釗仲話，作為旭日企業（393）董事長，佢做生意一向穩陣，風高浪急時要揸多啲現金。
咦，褲王今年4月先做咗單大刁，賣咗長沙灣貿易廣場全幢商廈，賺成10億銀，睇怕家吓有大把現金喺手。唔通佢真係睇通後市，沽貨揸現金？
講番呢單刁，褲王係咪賺好多？佢擰晒頭話：「唔係、唔係。」不過，跟住問佢係咪真係袋咗10億銀，佢又點點頭。其實10億銀對褲王嚟講，原來都好濕碎啫！