賭王何鴻燊噚日蒲頭，俾人問到美國金融海嘯，香港散戶點算好，賭王一貫作風，繼續叫大家冇有怕。佢話：「唔好震怯，定啲，唔使咁急」，跟住又話，揸住股票嘅可以擺吓先，臨尾再加句：「唔好受人哋影響，定啲。」
受邊個影響呢？聽埋賭王講嘢可能有頭緒。
同四叔不相伯仲
賭王轉個頭被問到個市幾時會定啲時話：「好難睇，四叔（李兆基）咁拿手，都話『我冇本事睇』咯。」賭王提起嘅，係今個月9號，四叔被問到今年底恒指目標，當時佢話「唔敢講，好敏感」。賭王呢句說話，有啲「潤」四叔成份。咁既然四叔唔敢講睇恒指見幾點，賭王就畀大家一個指引，「個市繼續會好，大家忍耐，𠵱家係艱難時期，但市民放心，巨浪乜浪都唔使驚，一路去到年尾會皆大歡喜。」
不過賭王潤四叔，都唔係第一鋪，上個周末賭王先攞四叔嚟做擋箭牌，被問到四叔炒股大損失，佢嘅成績又如何時，賭王話自己永不炒股，股票都放喺夾萬。雖然口裏不饒人，但講到「估市」，佢同四叔都不相伯仲。
舊年四叔同賭王幾乎輪流出嚟論市，四叔07年11月話，睇好恒指07年底去到3萬點，後來「調整」咗預測，話今年春會見3萬點，秋天就見三萬三。賭王同聲同氣話恒指舊年尾見4萬點，到年尾12月中個市弱咗啲，佢就話舊曆新年會上3萬點，咁最後兩個都估唔中，恒指喺07年尾最高曾見28128點，跟住就回番。
億二賣12幢村屋
雖然股市估唔中，但喺樓市賭王繼續風騷。華華最近聽到賭王好多年前同一啲原居民合作，喺西貢大網仔起嘅12幢村屋，以一億二千幾萬賣咗。每間千幾萬，以每幢2100方呎計，接近5000蚊呎。聽業界人士講，賭王佢哋放咗呢批村屋都有段時間，且講明要千萬一間。其實，村屋個海景又真係好無敵，可惜就冇車路到。
李華華
電郵：mailto:[email protected]