立法會選舉結果塵埃落定，公民黨MissMo毛孟靜喺九龍西直選落敗，佢噚日喺《信報》寫文分析賽果，講到泛民另外兩位候選人涂謹申同黃毓民，直接影響佢嘅得票。
曾講義氣撐毓民
今次選舉，好多候選人都打告急牌，一向好冷靜嘅MissMo雖然好關注選情，但眼見民調都話佢支持度超越涂謹申，於是眼見阿涂告急搶票，都只係依然故我咁繼續理性拉票，結果阿涂「反超前」，多佢萬二票成功連任。
講到社民連毓民，MissMo承認，起初「確曾掉以輕心」，一來以為毓民講過會繼續追住葉劉，照理佢應該喺港島參選，二來話唔信毓民開口就鬧人嘅方式會得。喺選舉論壇上，毓民喺對功能組別問題係咁片MissMo，雖然斯文講嘢唔代表理虧，但呢啲電視畫面一放上網，表現分確係畀毓民搶唔少。
幾年前本來喺商業電台好多聽眾嘅毓民突然封咪，泛民為佢搞咗個撐毓民燭光晚會，MissMo係個資深傳媒人，到場做主持撐足三個鐘頭。到𠵱家，MissMo都好語重心長咁話，「我不背信，我講義氣」。八方想話，呢啲嘢明眼人會睇到嘅，要做到佢咁大方真係唔容易。