自從AIG出事以嚟，好多人都擔心佢旗下嘅保險公司會唔會受到牽連，話晒人哋都曾經係金融界巨子，𠵱家要靠政府打救，佢哋遍佈世界各地嘅保單客戶，茶飯不思一啲都唔出奇。
南山人壽承諾繼續經營
為咗挽回廣大客戶嘅信心，AIG喺台灣旗下嘅南山人壽噚日就落咗個廣告，華華睇到之後都為之動容，想同讀者分享一下。
廣告嘅內容係，美國聯儲局將會科水800億美金畀佢哋嘅母公司AIG，南山人壽嘅運作將會一切如常，客戶權益唔會受到影響。最重要嗰句係，「南山人壽全體內外勤同仁秉持以往對保戶的承諾，在台灣這片土地上永續經營」。係咪有啲天荒地老，至死不渝嗰隻feel呢。
不過，華華心諗，如果個廣告早幾日見報會更加好，起碼保戶可以多個安心。畢竟，聯儲局打救AIG已經係上星期（9月17日）嘅事，應該唔算係新聞。