睇上市公司通告，通常悶到你暈，但有時都幾有娛樂性，譬如九月十八日，和記行（股票編號七二○）發通告講相連交易（connectedtransaction），內容係和記行屬下（擁有70.5%股權）嘅AutoItalia向公司主席及大股東RichardLee（李文輝）買入一架所謂VintageFerrari，作價四百六十萬元。呢架車係李先生喺二○○二年以一百四十萬買入自用嘅。其他汽車用咗六年，只會貶值，不會增值，但呢架經典法拉利經過六年之後，升值三點三四倍，好過買股票，譬如和記行嘅股價在九月十九日收市價係零點二三四元，五十二周高價係一元，最低價係零點一七五元，買呢隻股想賺錢唔係咁易。和記行發行股份共三點○六億股，市值七千一百六十萬餘元，一架法拉利就等於市值嘅百分之六點五嘞，李文輝個人佔和記行嘅39.25%股份，市值二千八百一十萬餘元，賣一架車畀AutoItalia相當於佢自己批股份總值嘅16.1%，和味之至。
問吓賓架C，一架舊法拉利究竟值幾多錢。賓架C話最緊要睇model與年份，佢自己都有一架出廠十九年嘅VintageFerrari，買入價二十幾萬，市值五十至六十萬，如果有人出價四百萬，佢一定賣。可惜和記行之通告冇講李主席架法拉利係乜款，乜嘢年份，只係話經由獨立第三者估值啫。
買法拉利咁好玩，玩完六年兼可升值三倍幾，唔怪得有錢人家咁願意買，我哋冇資格，唯有望門興嘆，連羨慕都冇資格。各位如果有錢，可以留意吓噃，雷曼兄弟啲賓架失業，紛紛出貨，賣樓賣車或新車撻定者，大有人在！經紀C話畀左丁山聽，淺水灣一啲向海獨立屋，好耐都租唔出，經過上星期大落大起之後，現時更難放盤；以往呢類屋，叫租二十幾三十萬一個月，多數係外國人（海外僱員）租用，適逢金融風暴，賓架全部縮手或退租，確實好難搵到客。經紀C話一啲洋房設計錯誤，洋人最鍾意露台嘅，但一啲洋房偏偏全部係落地玻璃向海，露台欠奉，洋人一睇就耍手擰頭。唐人租客呢？嫌呢類洋房冇地方曬衫，一定要用亁衣機喎！經紀C話建築師畫則之時要了解吓中西文化差別及市場需要至得。