中國投資公司舊年9月成立，今個月尾就慶祝一歲生日。由國家財政部發行特別國債集資買外滙儲備做註冊資本金嘅中投，亦喺一歲生日之前有自己嘅網站（ http://www.china-inv.cn）。據網站介紹，中投成立嘅目的係要「從事外滙資金投資管理業務」。
成日被傳想喺外國買嘢嘅中投，近一個星期，收購摩根士丹利嘅傳聞傳到㷫烚烚，其實佢哋都係想走向國際化。呢次終於整咗個網頁出街，隨咗迎合互聯網年代，仲提高透明度，係一個好大進步。
全球請31個精英
除咗整網站外，佢哋仲全球招聘人才，喺網站嘅招聘版，列明想請喺股權投資、固定收益投資、另類資產投資等11大類、31個崗位嘅精英人才。網站仲講明，「誠邀來自不同國家、不同文化背景的英才加入」，好明顯係走向國際。唔知係咪因為見美國投行唔掂，人浮於事，趁機吸納人才呢。