食咖喱，一年四季都啱。夏天無胃口可以增進食慾；冬天可以暖胃。早前有研究指出，咖喱內的薑黃具抗氧化及消炎功效，有助減低患老人癡呆症。唏，唔使講到咁深奧，最緊要好食啫！要食正宗印度咖喱，除了去尖沙嘴「重慶」，旺角砵蘭街都一樣有得食！
記者：周靜雯
攝影：楊錦文
喬寶寶：雖然我係錫克教徒（要戒豬），但因為工作關係已經無戒口，牛肉豬肉都食。我之前有幫襯廣華街這間，他們的食物夠晒正宗，做得好好。
由重慶到砵蘭
砵蘭街娛樂場所及舊商店林立，在這間跟旁邊店舖格格不入的餐廳內，竟可找到用心做的印度咖喱。「阿里巴巴咖喱屋」開業只有3個月，是老闆Sajjad開的第四間分店。Sajjad年輕時由印度移民到香港，起初在希爾頓酒店當廚師，後來自立門戶，在重慶大廈地下開設食店。
開舖10年後再於重慶三樓開設餐廳，可惜因大幅加租於2000年結業。講起「重慶」，總會記得門外一群印籍人士，一見客人就蜂擁而上，拉衫派傳單。但自五、六年前樓宇改換管理層後，這現象已不再復現，老闆的兒子Tony憶述，未變好時的「重慶」經常見到道友，仲有人收保護費。Sajjad亦輾轉到旺角廣華街及深水埗開舖，但舖面較細，人客多只能企住食或外賣，Sajjad近日終於在砵蘭街找到適合的舖位，開一間有得坐住食的分店。
印度住家味道
一般印度餐廳為了控制成本，習慣肉、汁分開煮，有客人落單時才會將材料合二為一。但「阿里巴巴」的咖喱卻採用汁肉一齊煮的印度家庭式做法，讓肉在煮的時候可以將肉汁滲入咖喱內，令整碟咖喱更濃、肉更入味。由於宗教關係，餐廳都會選用標明「Halhl」的食材，意指食物經過清真儀式處理，令煮的安心，食的放心。至於香料則沒有規定，但主要有五個C：豆蔻（Cardamom）、丁香（Clove）、肉桂（Cinnamon）、胡荽籽（Corianderseed）及小茴香（Cumin），簡稱5C；再要加入甚麼香料，就要由「煮」持人自行決定了。
記者推介！
羊肉印度炒飯$42
用上細長兩頭尖的印度米，炒起來更亁爽。白飯先用5C香料、月桂葉及黑胡椒一齊煮熟備用，黑胡椒更令飯一早帶有辣味。將飯加入羊肉咖喱炒勻至亁身，讓咖喱汁完全包着白飯，每粒飯都染成黃色，再配上味酸的薄荷醬，是比咖喱更刺激醒胃的選擇。
這些就是與印度米一齊煮的香料，而咖喱的黃色主要來自薑黃（Turmeric）。
馬沙拉印度脆餅$12
脆餅在印度是飯前小食，通常配以豆類一齊食。香口的脆餅，上面鋪有番茄粒、洋葱粒及辣椒粉，用來佐啤酒一流。
喬寶寶推介
咖喱雞肉$35/牛肉卷餅$20
因為家庭式煮法令咖喱汁充滿雞肉的鮮味，而且不會太稠或太稀，配上白飯和薄餅同樣美味。牛肉卷餅的肉是跟洋葱一同打碎，再加入胡荽粉及辣椒粉拌勻，最後加入黃豆粉，令肉卷不會在炸時散開，依足印度的傳統做法。
阿里巴巴咖喱屋（27838980）
旺角砵蘭街147號祥興樓地下
到舊舖睇老闆整餅
位於廣華街的舊舖，地方比新店細，但就可以看到老闆大顯身手整薄餅。老闆一邊大力將粉糰打到鐵板上，一邊大叫「阿里巴巴薄餅」，轉眼就做出一件印度卷，夠晒新鮮熱辣。除了咖喱、炒飯及薄餅等基本選擇外，這裏更有一些印度小食，例如炸雜菜、羊肉串和咖喱魚柳等，原來唔只係堂食，掃街一樣得。
羊肉串/咖喱雞柳$10/3件
這些印度小食看似好辣，其實辣度很低，特別適合不吃辣的人。
新疆回族薄餅店（23886671）
旺角廣華街1號仁安大廈地下14號D