人氣劇集《溏心風暴之家好月圓》前晚大結局，好多人為咗追劇假期都唔願出街，城中各大小食肆嘅電視機，都要播住套劇嚟吸客，八方有同事蒲吧，原來除咗有電視播足球，仲要搵多部播劇，確實熱潮難擋，就連專門負責婚外情問題輔導嘅明愛向晴軒，都發現求助情況亦出現家好月圓效應。
據向晴軒話，隨住家好月圓播出同好受歡迎，佢哋設立嘅婚外情求助熱線個案亦跟住上升，比平時多咗一至一成半。呢類求助之中，八成熱線都來自女性，大部份仲係好似荷媽咁嘅角色；婚外情問題，一般係一對夫妻，本來好哋哋，但之後其中一方就遇到第三者，即係好似Jo飽本來同荷媽結婚，生活本來好美滿，但之後紅姨介入，搞出錯綜複雜嘅關係。
飾演荷媽嘅李司棋喺劇中，雖然飽受家庭破裂壓力同波折，但仍沉着面對，最後破鏡重圓。向晴軒社工鄧姑娘話，現實當中要求助嘅「荷媽」，好多都係發現老公有外遇後，例如老公經常搵理由唔返屋企，又無意睇到老公收到一啲奇怪嘅短訊，就突然覺得思緒混亂，既擔心失去老公，又怕影響下一代成長。
徘徊三角關係感不安
唔好以為做橫刀奪愛嘅紅姨就一定奸得好開心、好逍遙快活。社工話，求助者當中，做人外遇或者第三者近期都增加咗半成，佢哋同樣徘徊喺三角關係而感到不安，部份人士仲要主動要求社工提供輔導。
電視劇角色一般都係忠奸分明，荷媽由頭到尾做盡好人，Jo飽做衰男人，紅姨就奸到出汁，最後惡人有惡報都冇人同情。但現實生活原來唔係咁一面倒，社工話，婚姻出現第三者，好難淨係責怪其中一方花心、唔夠專一，因為人際關係往往係雙方互動，仲有溝通問題、感情轉淡，先至出現第三者嘅刺激，而第三者亦多數拖拖拉拉，好少講到明要搶人老公。
社工又話，同實際環境一樣，《家好月圓》反映嘅婚外情問題，唔單止影響一對夫妻同第三者，其他家庭成員亦都面對好多困擾，所以有需要嘅人士，無論覺得自己係Jo飽、荷媽、紅姨……抑或阿卡定心女，總之遇到同類問題都可以搵向晴軒傾訴。
mailto:[email protected]