民建聯前主席曾鈺成係港大數學系高材生，可能大智若愚，近日教細路做功課時，竟然計錯數。話說阿曾月前亮相ATV一個兒童節目（又會咁得閒？）佢喺節目中，出咗條題目考班細路，條問題大致上係問，邊個數字除3會剩2，除5會剩3，除7會剩4呢？
班細路聽完後一臉迷惘，雖然阿曾不斷畀貼士，始終冇人識答，阿曾忍唔住窒人：「我小學時候學過喎，你哋冇讀㗎？」
好戲在後頭，阿曾見冇人講得出答案，惟有自爆，話答案係68。有網友將節目片段擺上網，指正確答案應該係53，好多人狂鬧阿曾誤人子弟，唔識數學又扮勁。
家長向電視台投訴
有家長甚至向電視台投訴，民建聯議員英文水皮，連數學都咁差，真係失禮。曾鈺成港大數學系一級榮譽畢業，曾協助訓練香港學生參加國際數學奧林匹克比賽，估唔到老貓燒鬚。噚日八方問起阿曾呢件𤓓事，佢直認當日計錯數，強調係一時大意，「我出嗰條題目，同我心諗嗰條題目唔同嘅。」
http://www.youtube.com/watch?v=Akd0Ll4Hb5c