立法會選舉期間，網民發起「口投民建聯，票投社民連」之類擾敵策略，結果搞到港大鍾庭耀個金漆民調招牌搖搖欲墜。當晚港大票站調查，將新界西民建聯名單排第三嘅梁志祥都列入當選「機會均等」嘅組別，開票後先知佢輸好遠。
鍾庭耀同八方解釋，由於新界西個別票站較多「大話精」選民，所以推算得票率時，要酌情調高安全系數，結果正路計當選機會唔大嘅梁志祥，都歸類埋「機會均等」組別。呢個誤差可能唔算離譜，鍾庭耀話：「當晚另一調查機構（八方查過，應該係有左派背景嘅香港研究協會）推算出田北俊同蔡素玉當選『機會極大』，如果我哋得出咁嘅結果，已經摺得喇。」言下此意，佢塊招牌始終硬淨啲。