𠵱家啲人越嚟越着重健康，呢輪毒奶粉嚇怕唔少港人，事實上喺日常生活，我哋不知不覺食咗啲唔健康食物，簡單到味精咁，𠵱家好多預先包裝食品都加咗味精。小妹都唔曉分，最叻就係知即食麵入邊包調味粉係味精，惟有請教吓消委會老友。
老友話，好多預先包裝食物加咗味精，好似醬料、罐頭肉類、罐頭湯都會有。如果想唔食咁多味精，就要留意預先包裝食物嘅配料表，同埋要識得一個密碼「621」嘞。
根據《食物及藥物（成份組合及標籤）規例》，如果預先包裝食物含添加劑，必須在配料表列明添加劑嘅類別、名稱或食物添加劑國際編碼系統嘅識別編號。好似味精嘅真正化學名叫穀氨酸鈉（英文稱monosodiumglutamate，簡稱MSG），而識別編號就係621或E621或e621。只要喺配料表見到以上嘅名或號碼，就即係含有味精。
話時話，味精又係啲乜冬冬？味精本身原來係冇乜味，樣子呈白色結晶或粉狀，加進食物可增加其鮮味，原因未能完全理解，科學家相信係穀氨酸鈉刺激舌頭嘅味蕾而增強食物的味道。至於味精會唔會對人體有害，聯合國糧食及農業組織將味精嘅每日可攝取量列為「不詳列」類別，即係話毒性甚低。
中文大學生物化學系食品及營養科學課程講師梁禮國教授話，暫時冇確實證據顯示穀氨酸鈉會引致不良反應，但當然攝取越少越好。
電郵：mailto:[email protected]
逢周六、周日刊出