「金牌莊家」詹培忠躊躇滿志，搵多個新丁獨立議員食飯，希望組成「親中反曾」聯盟，可惜好多人只吃飯不落叠，初時有八個人口頭應承，𠵱家只有三、四人加入，其中一個係「法律超人」謝偉俊，好多人都學葉劉話齋，只有興趣加入「飯聯盟」。老詹今勻揸莊唔成，佢噚日接受飛哥訪問時話，係因為好多方面從中作梗，西環（中聯辦）、中環（特首辦）都有人出手，「兩辦」夾擊之下，佢已盡力而為。
老詹又話，自己係「親中維港」，唔係越填越細個維港，而係維護香港利益，對於煲呔民望低，施政又唔掂，佢批評港澳辦名為主管香港事務，卻好似不聞不問，任由煲呔自把自為，係唔負責任做法。