溏心風暴之家好月圓 鬥戲人辦
繼去年大契後，李司棋在《溏心風暴之家好月圓》中，再憑荷媽一角博得觀眾掌聲，不過89年因首任丈夫葉志鵬有第三者而離婚的司棋姐，直指荷媽完美到根本不像一個人，尤其是被丈夫Jo飽（夏雨飾）拋棄後仍能跟他同枱吃飯最不可思議，她說：「因為我唔係一個可以咁樣嘅人，我唔原諒你就唔會見你，就算你喺我面前出現，我都會詐諦睇唔到。」 撰文：戴彩煥
無綫劇集《溏心風暴之家好月圓》今晚大結局，演活荷媽一角的李司棋近日忙為該劇造勢外，更忙於綵排本月27日公演的舞台劇《留住百味情》，工作排得密麻麻。今次記者也僅能佔用司棋姐的晚飯時間，在北角排練室跟她做訪問。談到荷媽這個角色，司棋姐坦言太過完美：「我覺得荷媽唔係太似一個人，佢同夏雨嗰種感情，我真係唔知點講，我覺得一個女人如果俾夏雨咁拋棄，點都會鬧夏雨一兩句，有啲場合應該怨佢，但荷媽冇。」
眼鏡摑極唔甩
司棋姐續說：「荷媽太完美，現實中幾難有咁嘅人，老實講，大家離咗婚，間唔中畀佢見吓啲仔女好正常，但見吓見吓畀佢返埋屋企食飯，我就覺得呢樣嘢奇怪啲。大家同枱食飯，你話做唔做得到？我成日都咁諗，因為我唔係一個可以咁樣嘅人，我分得好清楚，原諒你就原諒你，我唔原諒你就唔會見你，就算你喺我面前出現，我都會詐諦睇唔到。荷媽所以做得到（指原諒Jo飽），係因為呢個人唔會喺背後講前妻壞話，無時無刻都同大家講對唔住，畀着有人同我講，喺適當時候都會work嘅。」
89年司棋姐因為首任丈夫葉志鵬有第三者而離婚，二人再見不是朋友，若前夫跟她說句對不起，她又可會像荷媽一樣原諒他？司棋姐斬釘截鐵說：「佢𠵱家講就太遲啦，都係嚟唔切，因為佢實在太衰喇。」
在《家好月圓》結局中，荷媽跟Jo飽會否破鏡重圓，觀眾非常關心，對此司棋姐說：「荷媽其實離開情情塔塔嘅嘢已經好遠，係班細路哥起哄，想Jo飽返嚟一齊住，所以荷媽接受佢，但劇情冇交代佢哋再結婚。」
司棋姐跟米雪飾演的紅姨在劇中不乏對手戲，其中一幕講述紅姨在洗手間怒斥荷媽是狐狸精，狠狠地摑了她一巴掌，摑到荷媽連眼鏡也甩出來，最令司棋姐印象深刻：「劇本講明一巴掌打落我塊面度，眼鏡要飛出去，點知副眼鏡打極都唔甩，我問導演唔甩眼鏡得唔得，導演話唔可以，劇本話明要甩就一定要甩，班編導真係用咗好多心機去寫，佢哋想表達紅姨個氣勢同個力度，咁我哋都尊重佢哋，後來我將副眼鏡除少少，米雪再搵隻手指尾一拉，咁先至甩到。」
不能改動對白
司棋姐不諱言今次《家好月圓》所有台詞對白，乃是「一個字也不能改」，所有演員全都要跟足劇本去做，司棋姐說：「我哋呢個劇冇人改劇本，改咗會有事，監製跟得好緊，日日睇playback，講錯咗要返去再配過音，我都試過，本來有句我同陳豪講『一路行一路講。』但我改咗做『上到去我話畀你聽。』但咁都唔得，咪第日再返公司配過音囉。」
談到《家好月圓》最辛苦場口，司棋姐直指是與六子女分開一幕：「嗰場戲講我同仔女（由小演員飾演）分開，佢哋俾人拖上車，自己就唔捨得猛喺度喊，第一日因為落雨拍唔成，到第二日開工，又撞正三號風球，三號風球吹到啲報紙滿天飛，根本冇可能拍到。我打電話畀統籌，叫佢哋唔好嘥時間，不如放大家走，但公司唔畀收工，大家由中午12點等到下晝4點掛8號風球先可以收工；到第三次終於拍得成，但嗰日係香港最熱嘅一日，我着住件冷衫喺條街度曬，返到屋企又暈又嘔，有少少中暑，呢場戲真係拍得好辛苦。」
雖然《家好月圓》幾乎晚晚有高潮，但不少觀眾卻嫌太家嘈屋閉，司棋姐認為編劇今次處理手法無非是要留住觀眾：「製作嚟講係睇收視，怕慢慢鋪排，啲觀眾會走晒，好似嗰時《溏心風暴》慢慢先等到收視有三字頭，但等到三字頭嗰陣，套劇都差唔多播完，所以今次就用咁嘅方法拉住啲人嘅注意都未定，我覺得今次處理方法都OK。」
《家好月圓》似骨肉
《溏心風暴》令58歲的李司棋事業再創高峯，名利雙收，更在去年無綫台慶頒獎禮中勇奪視后殊榮，究竟《溏心》跟《家好月圓》，司棋姐較喜歡那一部？司棋姐笑說：「我喺《溏心風暴》嘅戲少啲，感情唔一樣，我停咗六、七年先再出嚟拍嘢，係好值得紀念嘅一套劇。至於《家好月圓》就好似生個仔出嚟咁，自己骨肉一定鍾意㗎。」
好腳頭密密賺
《溏心》之後，司棋姐由尖沙嘴搬往何文田約值700萬元的豪宅居住，身家三級跳，今次拍《家好月圓》，司棋姐又會否越住越富貴？她笑說：「其實拍完《溏心風暴》後乜都冇（指生財之道），只係多咗一兩個廣告，因為要即刻開拍《珠光寶氣》，但《家好月圓》腳頭好啲，接咗幾個廣告，好似會喺馬來西亞拍一個雪櫃同一個冷氣機廣告，內地又會拍煮食用具等，都OK㗎。」
保守估計，司棋姐今次起碼賺七位數字酬勞。司棋姐未有否認，只一味笑說：「我唔識計，問TVB啦，不過我都幾開心嘅。」
問司棋姐對於若開拍《溏心3》有何意見？她說：「我有諗過，但我覺得見好就收，唔好再去，差唔多劇種可以再埋班，唔一定原班人馬、一個都不能少，唔需要呢啲。我有問過劉家豪（監製），但佢冇出聲。」
荷媽心聲 最愛劇中金句
「多行夜路必遇鬼，多行不義必自斃」
司棋姐最喜歡「多行夜路必遇鬼，多行不義必自斃」，覺得很有警惕作用，她說：「唔好以為做衰嘢冇所謂，始終係有報應。」
自選最愛場面
鬧紅姨狐狸精
「紅姨（米雪飾）告Sa姨（關菊英飾）誹謗，我帶咗一張20萬支票到紅姨屋企向佢求情。另一場係紅姨開記者會，我到記者會搵紅姨，並喺大庭廣眾下指佢係狐狸精，力數佢嘅不是，非常痛快。」
表現最好演員
陳豪最突出
「我最鍾意蓮子蓉（黎耀祥飾），但戲份太少。我覺得陳豪都做得好好，阿卡呢個角色佢有設計過，係咁多個仔女入面最突出嘅，男演員除咗陳豪外，夏雨都做得好好。」