吳家樂跟太太周蕙蕙結婚不到三年，就已三年抱三，因為其中有對是孖仔，實在羨煞旁人。問到人人羨慕生孖胎，但當事人就話超辛苦。「湊大女嗰陣已經覺得係非人生活，到孖仔出世簡直得番半條人命！」咪以為電視上的家樂夠搞笑，湊仔當玩，現實中的他自詡是嚴父，連玩玩具都不能同時睇電視，最低限度要教曉他們應有的規矩。
記者：林佩婷
攝影：譚盈傑
場地提供：玩具反斗城（29916222）、Sigma（25770066）
孖仔失算案
06年大女Nadia出世，橫豎嬰兒用品都齊全，兩夫婦決定趕快再造人，心諗唔使隔幾年生又辛苦多次。幸運地不久後真告懷孕，而且打孖來，開心之餘卻又令他們大失預算。「本來樣樣預備一份，即刻又要預多份。見到太太個肚五個月就已經好大個，又行唔到，戥佢辛苦之餘我又要諗埋點樣養點樣搞，到將來學校又要點樣選，諗到頭都大埋。」未生已經諗到將來讀書？「當然啦，𠵱家喺香港讀書真係好複雜，又話殺校、又話中英文教學……雖然超辛苦，但懷孕係上天安排，有啲人想生都恨唔到。」
間隔式餵奶特訓
到孖胎真的出世了，每逢食奶、換片或瞓醒就最慘，「老婆坐緊月，工人又要照顧大女，我一對手都唔知幫得邊個，萬一佢哋喊醒埋家姐，三個齊喊真係好得人驚！所以好似餵奶咁，就刻意分開餵奶時間，訓練到其中一個隔30分鐘至1個鐘先食奶。一個瞓醒即刻抱開，以免嘈醒另一個。最慘一個病咗，好快三個一齊病，前排兩個仔仔都有氣管炎，唉！頭嗰幾個月，幾乎完全無得瞓。就算𠵱家最多只瞓到四至六個鐘！我同太太都要等深夜嗰陣，先有少少時間落街食碗麵唞吓氣。不過即使咁辛苦，但見佢哋每日都有少少變化，個感覺好滿足。」
孖仔性格大不同
好多時以為孖仔性格差不多，但家樂的孖寶貝由外到內都不一樣。「佢哋係異卵雙生，完全唔似樣，大孖Nigel超多頭髮，細孖Nathan就無乜。連性格都好唔同，哥哥夠獨立，八個月大就識企，最鍾意企喺度周圍望，你抱佢反而扭落地。細佬成隻樹熊咁，勁愛扭抱。玩嗰陣兩兄弟必定要分開玩，因為佢哋成日頭撞頭好似打摔角，又或拉衫扯頭髮好危險。」於是，這個孖仔爸爸不為他們買一模一樣的衣服、不留相同髮型，「孖仔都屬於獨立個體，我覺得唔好畀佢哋着同樣衫，以免佢哋以為大家係一樣。就算係同款都要唔同色。」
變身湊仔專家
以前家樂鍾意運動，打拳、高爾夫球、保齡球等，家陣諗都唔使諗，兩夫婦出街最大節目就是幫BB買嘢。「咪以為我哋只會買貴價嘢，其實BB大得快，買貴嘢根本係浪費。應該從質料及設計考慮，有啲設計係背面扣鈕或拉鏈，瞓覺唔方便又唔舒服。又好似BB凳，梗係要易清潔為主。小朋友玩具更唔可以多，反而要有功能。好似家姐開始要玩啲益智玩具，仔仔就要買啲刺激感官玩具。」短短幾年間，大男孩變身湊仔公。
吳家家規嚴
Nadia快兩歲、孖仔約八個月大，但家樂話小朋友從小便不能寵，還要學規矩。「好似食飯一定要坐好食完先准走，唔准睇電視，連玩玩具同睇電視都唔能夠一齊做，以免分心。家姐𠵱家性格好似管家婆，一見我哋亂擺電話或遙控，就會咿咿哦哦，甚至幫我哋放番好。咁耐以嚟只有一次囡囡眼瞓扭抱唔肯飲奶，搞咗好耐都唔掂，最後惟有放喺房由佢喊到收聲為止，唔准人理佢。雖然我勁心痛，但嗰刻知道自己唔可以心軟，否則以後好難教。」
