《蜘蛛俠3》因為激戰連場加上聲畫俱佳，一直被捧為BD天碟，不過佢個地位將要不保！皆因近期不少BD佳作輩出，專業影音工程師Ricky就揀咗其中5隻作推介，佢仲話《鐵甲奇俠》質素絕對同《蜘蛛俠3》有得揮，看來BD天碟的寶座有排爭！
記者：吳允冲
攝影：譚盈傑
鳴謝：米樂影音
《鐵甲奇俠》史上最強2HD！ 售價：$255（美版）
聲音：★★★★★
畫質：★★★★★
娛樂性：★★★★★
5隻勁碟中，Ricky最Buy新上市《鐵甲奇俠》：「佢係少數採用2HD聲軌的大片，睇爆炸、對戰場面特別震撼，而且低頻伸延的衝擊夠強，立體聲令觀眾充滿包圍感，而槍戰場面的『發發』聲好正，夠晒官能刺激。」究竟《鐵甲奇俠》有甚麼比《蜘蛛俠3》更優勝？Ricky話單喺視覺上，Ironman的金屬感在造型上比Spiderman的塑膠感已經型好多！而且Ironman製作較認真，在畫面的細緻度上Spiderman完全被比下去，最重要係套戲本身好睇無悶場，從各方面睇都係享受。
《變形金剛》BD版更靚聲 售價：$255（美版）
聲音：★★★★☆
畫質：★★★★☆
娛樂性：★★★★★
早前HDDVD版《變形金剛》，好多人就係為咗高清柯柏文而入股HD，隨着HD玩完，BD碟兩星期前終於見街，BD採用2HD，比HD碟的DD+聲效更優勝，無論聲音的密度同質感都靚過HD版，但論畫質都係無顯著提升，不過《變形金剛》CG效果本身已經好出色，1080p畫質一流，超合金質感非常細緻，就連SpecialFeature都係BD規格，柯柏文迷必撐！但係美版無中文字幕，行貨就要再等吓。
《標殺令Vol.1&2》刀光劍影立體聲 售價：$235（美版）
聲音：★★★★☆
畫質：★★★☆☆
娛樂性：★★★★☆
作為一套五年前舊片，當然不能期望《標殺令》的畫質能與新片相比，不過亦合格有餘！雖黑位有Noise，但情況可接受。Ricky話：「LPCM5.1聲效表現超驚喜，比DTS實在高幾班。尤其是第一集奧瑪花曼同黑人對戰一幕，揮劍同碎玻璃聲都表現得清脆利落，聲效非常立體。」
《赤壁》港產BD聲效至強 售價：$228
聲音：★★★★☆
畫質：★★★★☆
娛樂性：★★★★☆
赤壁好唔好睇，各有睇法，但聲效卻是港產片中之頂級。Ricky推介MasterAudioDTSHD：「鍾意佢夠誇張兼低頻好勁，鍾意勁Bass就啱晒！」而且畫質維持在26Mbps以上，無因為聲靚而犧牲畫質，雖暗位有雜訊，但喺室內、夜晚的場景都表現出色。
《三國之見龍卸甲》天碟洗寃錄 售價：$238
聲音：★★★★☆
畫質：★★★★☆
娛樂性：★★★★☆
五隻BD之中以呢隻《三國之見龍卸甲》最被人遺忘，Ricky話要幫佢翻案：「雖然呢套戲比較小品，但係都聲畫俱佳，無論用未經解壓的原音LPCM7.1定係DTS–HDMasterAudio都一樣咁震撼。」Ricky讚聲音空間感廣，最正係對打時的兵器金屬撞擊聲，觀眾可以感受到劍的重量，現場感一流。
