「飲勝！咁至醒！」08年慕尼黑啤酒節上周六揭幕，將為期16日到10月5日止；我求大俠預計今年啤酒銷量將破紀錄，因為拜仁上周六2:5主場不敵雲達不來梅，球員、球迷心情麻麻下，自然要飲多幾杯借酒澆愁！
碧根鮑華：冇咩大不了
我求大俠當晚都應吓節，揸杯啤酒撐拜仁教練奇連士文場，點知竟然先輸5粒，仲以為自己醉咗眼花㖭！雖然保路斯基追番兩球，不過仍創下30年來主場失波最多紀錄；難怪看台上好多球迷都提早離場，去附近廣場飲多幾杯好過。
賽後，奇帥以「黑色星期六」形容大敗，仲鼓勵球員吸取教訓，切忌做鴕鳥。其實，呢啲說話留番畀佢自己啱啲，睇吓佢仲敢唔敢用3中堅。不過，考慮到拜仁有中場大腦列貝利同前鋒高路斯缺陣，我求大俠今次就原諒你啦！
拜仁會長、「凱撒大帝」碧根鮑華賽後面色陰沉，但居然冇怪責球員同奇帥，話自己76/77球季最後一季打拜仁，都試過主場0:7慘敗畀史浩克04，「呢種罕見賽果冇咩大不了！」之後仲建議球員：「𠵱家唯一解決方法，係大杯大杯咁飲！」
中國式「賜酒」咪話唔驚
正所謂一醉解千愁，拜仁球員的確可以盡情亁杯，但奇帥就要適可而止喇！點解？佢老婆身為香港人，最清楚中國啲皇帝最興「賜酒」，送大臣最後一程；所以，咪聽到碧根鮑華話亁咗佢，就真係「咕」一聲吞落肚！
我求大俠知道奇帥喺office同訓練營擺下「千佛陣」，可惜到目前佛祖好似唔多保佑佢；今次不妨借啤酒節向每尊佛像敬酒，咁下場波就可以贏波，我求大俠唔會點你嘅！