游清源一篇「搓ourbreast」轟動中環，OL到處傳閱，於是捧紅咗新科議員陳克勤，紅過李克勤㖭，左丁山用iPhone按入YouTube，立即有得睇陳議員發言。呢個年頭，要走紅並不容易，克勤仔好嘢吖，講一段英語，就立即無人不識，果然係民建聯後起之秀。
中環周圍有人講英語，一啲人真係講得好掂，令人傾服，但亦有不少人講寫英語係咁意啫，照樣搵到食。呢日中午出門吃午飯，經過一間公司寫字樓，玻璃門內空無一人，應該係全體人員已出外吃飯啩。玻璃門上貼上一字條：Outoflunchuntil2:30pm，不禁失笑。呢間公司嘅老闆係英國人，全部夥計係唐人，何以啲夥計貼張字條都寫錯咗英文呀？應該係Outforlunch（出外午膳）先至啱，Outoflunch相等於「午膳欠奉」或者俗啲講，「冇晏食」。唐人學英文，最怕前置詞之使用，因為無規可循也。好多中環秘書講慣：「老闆outtown」，其實應該係outoftown（出咗門），講得多，以為出外午膳就係outoflunch。
唔少笑話源於當事人不知來龍去脈。譬如九月十九日下午在寫字樓睇now新聞台，講一位前美林副總裁喺上海講金融風暴，基本上分析正路，左丁山同意佢嘅講法，但now嘅記者唔知根據乜嘢資料，旁述話：「胡××有華爾街神童之稱，三十三歲就成為美林副總裁，係第一位中國人做美林副總裁……」笑話啦，副總裁（VicePresident）好高級咩，MBA入咗投資銀行，五年之內做到副總裁，冇運行嘞。美林之內，唐人副總裁嘅數目，多到數唔清，有乜咁神奇？唔信就問吓財經事務及庫務局局長政治助理伍潔鏇。伍小姐以前係美林嘅律師，知道美林事務。講起嚟，𠵱家發生美國金融十級大地震，震央在紐約華爾街，殃及各國各地區，令各地政府窮於應付。呢，香港嘅財經局局長陳家強係財務學教授，副局長梁鳳儀係前金管局高層，政治助理來自美林，正好組成鐵三角，理論與實務兼備，應付金融風暴，佢哋有信心啫。之不過政治層面就唔知嘞，譬如雷曼迷你債券事件，令不少中產階級遭殃，為禍慘過Accumulator，政黨追究起嚟，究竟由金管局還是由證監會負責，天曉得。