上個禮拜港股先嚟個大奇迹日，之後又升千幾點，好多網友都蠢蠢欲動，ryanhk852都想入貨，喺網上討論區問意見。
佢問：「(1)若然阿爺突然話唔玩，恒指即時打靶，直插幾千點嘅話，咁點算？(2)雖則阿爺大把水，永不亁塘，但係，萬一水源冇咁充足點算？(3)美國先前爆咗兩房，啱啱又爆埋雷曼、AIG，萬一仲有大嘢爆，點算？(4)各國央行齊齊輸血，係咪代表市場已經失控！輸咗血之後面色好咗，但係呢次係內傷，瘀血未除，內傷仍在，幾時會復發？(5)復發之後，會唔會仲傷過之前？如果會，咁點算？98年特區政府托市，一衰就衰足幾年，08年又托，鑑古知今，呢次又會唔會好似上次咁？」
政府托市衰幾年
如果邊個識答晒呢啲問題，畢菲特應該好甘心讓個股神位出嚟！powmak回應咗頭三條問題:「(1)阿爺喺中央電視台宣佈入股，絕非講玩。(2)唔使你憂。(3)外國問題，唔關中國事。」faiz好言相勸：「9.18執唔到死雞就算啦，唔好博！」其實家陣個市邊度咁易俾你捉到路，正如Henry1268話齋：「股市=估市，估中有錢賺，估錯要輸錢。」