畢生志願唔係人人揸波子！最好淺水灣整間過萬呎遊艇別墅、對住青馬大橋住洋樓養番狗，現實中……難？今日教大家網上買樓，唔使中原或美聯，所講係PS3將推出嘅PlayStationHome線上社群服務，繼日、美、歐後，港、台終展開封測，玩家好似玩《SIM》咁，在其內建設虛擬房間，自訂角色外形與其他玩家進行各式互動、睇最新電影及遊戲Trailer，至於遊戲功能亦唔缺少！
記者：許福合
攝影：陳盛臣
實試報告 有香港景！？
PlayStationHome可以話大大加強咗PS3玩家喺網上嘅互動性，不過呢類網上服務唔驚無人玩，最怕Server頂唔順，所以PSHome已公佈一段時間，直到日前才正式舉行「非對外公開」封測。記者測試時建立賬戶亦需要輸入一組由SCEH得來認證碼；至於正式推出日期，SCEH暫時都未能確定，相信係要測試到Server運作暢順，希望正式推出之時可避免一般網遊常見死Server、Lag等情況。
DIY 室內設計師
建立賬號後，記得仲要下載及安裝PSHome（85MB），第一次登入會進入角色設定，能選擇項目非常多，除男女性別外、體重、膚色、髮型、服裝、飾物都能進行詳細設定，勁玩配搭個人風格！進入PSHome世界，介面基本全使用3D視點，現時主要分為HomeSquare、MyHomeSpace、HomeTheatre及GameSpace四大區。第一次進入推薦先去Space，預設房間內有個向海露台，景觀絕佳，玩家仲可以放置傢俬及各種擺設，位置可全由玩家安排設計，完成後仲可以邀請朋友嚟參觀。
勁Hea 吹水打機社區
將各處場景連接起來就係HomeSquare，這邊特別之處係周圍都設有廣告牌，上面都係最新遊戲介紹，而在一個角落仲設有一個露天巨大銀幕，上面會播放遊戲Trailer，只要位置夠近就可以享受到震撼音效，好有現場感！
而HomeTheater及GameSpace就分別係影院及遊戲區，前者可以欣賞電影及遊戲Trailer（封測時只有遊戲Trailer），而後者就提供有桌球及保齡球等可與其他用家互動遊戲，另還設有機舖可以玩到《無限迴廊》及namco等經典遊戲。
現時因為仍屬封測階段，所以玩家未算好多，主要集中於晚上出現，而玩家見面時可以打中文英交流，而系統亦設有多種趣怪動作可使用，甚至可作語音交談，又如現實一樣。
查詢網址： http://asia.playstation.com/hk/promo/home/