立法會選戰生靈塗炭,田少、周梁落選固然其情可憫,劉千石嘅挫敗都令人無限欷歔。話就話成王敗寇,但係社會上唔少人仲好關注阿石嘅去向。佢接受香港電台訪問,仲未講得出今後用乜形式繼續為工人打拼,反而娓娓道來生命中三個真女人。
唔使八方話畀大家知阿媽係女人,係人都會感受到,阿石命中最疼的女人,就係石媽。呢樣嘢傳媒報道咗好多毋須重複,不過阿石喺港台節目《清談一點鐘》度,就用咗個好新鮮嘅比喻形容石媽。
將母親比喻北京政權
阿石話,石媽媽冇乜學識,教仔女並冇甚麼特別板斧,最大特色就係對子女好嚴,對外邊啲人好寬。即係點呢?阿石打咗個好絕嘅比喻:「好似中國北京政權一樣,對外面啲人好好。」阿石細個時,如果同外面人有爭拗,石媽一定先打到佢屁股開花皮開肉綻,令兒女明白到做人點都要處理好自己份內事先。阿石話,呢樣嘢對佢影響較深。
石媽今年4月仙遊,老人家對阿石影響更深嘅,應該係自從阿石可以返內地探望娘親之後,政治性情大變。於是佢又講到另一位女人,陳方安生。阿石八年前可以同分離11年嘅石媽重聚,三年前獲發10年期回鄉卡,陳太喺任職政務司司長時都幫過忙。
講番陳太嘅幫助,阿石話,石媽媽在生嘅時候都好記掛呢位恩人。有人話阿石可以母子團圓係董建華嘅功勞,阿石就話做牽引嘅係陳太都好重要,佢話恩情無分大小,總之好感謝兩人。
但係講到最敬重嘅女人,阿石首推仙姐白雪仙,直情係佢啓蒙老師,因為仙姐對人感情好深,對有需要照顧嘅人,唔會計較自己身份。阿石特別欣賞仙姐對粵劇嗰種奉獻精神,佢話未見過一個人可以完全委身一樣嘢,身家性命都不在乎。
阿石咁識欣賞女人,唔知點解硬係孑然一身。唔好怪八方諸事,事關阿石噚日都爆響口,終於承認自己六年前患上直腸癌,雖然癌細胞已受控,但身體仍然虛弱,屋企雪櫃裏藥丸多過餸菜,日日食靈芝。你話,年屆64嘅佢,係唔係應份搵番個伴,向單身說再見先?
mailto:[email protected]