啱啱過咗嘅周末，《福布斯》公佈「200家最佳亞洲企業榜」，上榜嘅包括嚟自中、港、台嘅華資上市公司，合共88家，佔個榜44%。個榜係按企業過去3年，營業額、盈利增長等選出，其中條件係過去1年營業額喺10億美金樓下（即78億港銀）。
當中市值最大係阿里巴巴（1688），市值65.36億美元（509.8億港銀），雖然阿里巴巴股價唔生性，上個禮拜五市值得番407.7億港銀，但無損佢喺呢個榜市值一哥嘅地位。至於盈利最高嘅企業，係合景泰富（1813）。
理文李文俊踢出榜
華華留意到，香港有個富豪新一代入咗榜──彤叔鄭裕彤旗下新世界百貨（825）今年上榜，呢檔百貨雖然由阿仔鄭家純做主席，但近年都由乖孫鄭志剛（Adrian）擔大旗，今次佢都算交到成績畀阿爺睇。
同人唔同命，同係新一代富豪嘅李文俊，檔理文造紙（2314）就被踢出榜。據《福布斯》講，佢哋嘅市值由上年30億美金（即234億港元），跌到得番5.88億美金（即45.86億港銀）。
今年踢出榜嘅，仲有上年營業額仲係6.93億美金、市值216.95億美金嘅港交所（388）。
美國金融企業巨無霸逐一冚檔，睇怕當地經濟有排衰。香港勝在背後仲有大陸頂住，一啲靠做內地生意嘅上市公司，受嘅影響反而冇咁大，有啲更加受惠北京奧運，好似李寧（2331）同內地運動服裝品牌鴻星爾克，都齊齊入榜。
福布斯200佳企業榜部份香港上市公司
‧港上市公司：李寧（2331） 07年營業額：45
‧港上市公司：合景泰富（1813） 07年營業額：42
‧港上市公司：信義玻璃（868） 07年營業額：28
‧港上市公司：阿里巴巴（1688） 07年營業額：24
‧港上市公司：稻香（573） 07年營業額：21
‧港上市公司：新世界百貨（825） 07年營業額：10
‧港上市公司：味千中國（538） 07年營業額：9
‧港上市公司：現代美容（919） 07年營業額：8
‧港上市公司：安東油田服務（3337） 07年營業額：5
單位：億港元
電郵：mailto:[email protected]