本欄讀者之背景廣泛，有時令左丁山驚奇，譬如前一排本欄講及香港足球黃金時代，提到舊事，曾以為寫得太多，年青讀者唔識，冇興趣，故此就住就住。點知呢日收到兩封讀者來函，讀者皆自稱年過七十，一位居於英國嘅葉先生，一位住在大角嘴嘅梁先生，話題不約而同，都係講足球，緬懷昔年姚卓然、何祥友、李春發、周少雄等南巴大戰球員。老球迷記性特佳，好多球員名字，左丁山唔知嘅，佢兩位都識背。既然如此，以後在適當時機寫一兩篇足球便是。
一位自稱「文化有限」嘅長期讀者Ｆ來便條云，佢來自珠三角某縣，家鄉幹部在九月七日立法會選舉前打電話畀佢，要佢投票畀保皇黨。讀者Ｆ唯唯諾諾，入到票站就投抗議票畀長毛。內地幹部有鋪癮，指點香港選民投票，左丁山一位朋友Ｂ在內地設廠，亦收到類似電話，而且更進一步，要朋友Ｂ呢類老闆階級發動僱員下屬嘅家人，投票畀保皇黨，令朋友Ｂ感到有壓迫感。朋友Ｂ投票畀邊位，佢唔肯講，但黃毓民在佢嘅選區高票當選，唔知與內地幹部啲電話產生反作用有無關係呢？好多人本來揸唔定主意如何投票，但一收到電話指示之後，未必照跟，故意投畀長毛、毓民，一啲都唔奇。
朋友Ｇ屬九龍西選區，與自由黨周梁淑怡相熟，周梁在新界西落選後，佢曾致電慰問，佢話周梁並無失落感，亦無外間所傳之bitterness，講電話仲哈哈笑㖭，咁又點解好似憤憤不平咁，要數劉皇發不是呢？朋友Ｇ話：「周梁在競選末期，已發覺票源不穩，只有全力去做，力拼到底，所以宣佈點票結果時，佢自己並不感到意外。接受現實。周梁唔認為有鄉事票支持就會贏，佢只係覺得劉皇發在自由黨多年，算係黨內資深人物，但到咗競選，就一面倒支持民建聯，對自由黨不屑一顧，所以覺得不快，傳媒講起，咪有感而發，佢份人素來都係有話直說㗎！」周梁與劉皇發有何恩怨我哋唔知，只係聽劉先生接受有線電視訪問，一副口吻，畀觀眾嘅感覺係有啲毓民口頭禪──你吹呀──嘅意味，我哋聽見，實在覺得滑稽。