中資股上星期五勁彈，兩三成升幅，係閒閒哋，珠江船務（560）升得區區8%，仲係殘到爆。
珠船啱啱公佈08年半年度（6月底止）業績，純利7364萬銀，仲錄到15%增長。祖國上半年經歷天災，油價又一支箭，喺咁惡劣環境底下，珠船有咁嘅增長，算係唔錯。保守計數，珠船08年全年度純利，只係維持到上半年度嘅增幅，上到1.64億銀，預期PE都係得4.8倍咁大把。
再講，珠船中期keep住每股派息兩仙，又當08年度派息，維持番上年水平，息率都講緊挨住7厘水位，講息率回報，又係吸引到痹。珠船啱啱創出1年低位冇耐，集團手頭每股淨現金0.66元，係現價（0.87元）75%，淨現金比率咁高，亦冇有好怕。以珠船翻半番計，價見1.33元，到時預期PE都係講緊8倍水位，一啲唔過份。
中糧中長線肥仔水
中國糧油（606）公佈冇耐嘅08年半年度（6月底止）業績，純利勁升1.7倍到16.86億銀，實情靚爆鏡。就當集團全年度只係維持半年純利數額，預期PE都係講緊9倍。中糧主打業務之一，係食用散油及油籽粕生產，兼且係祖國最大生產商之一。主打產品嘅係必需品，加埋祖國人均消費力提高，中長線應該繼續肥仔水。
撞正集團呢期跟個市插水，提供執平貨機會。就以保守性預期9倍PE計數，中糧上番往績13倍PE水位，講緊要升42%到6.1元。
錢雋