「都話咗自由市場唔係萬能㗎啦!」一輩子當官僚的EL，在華爾街告急的一天，似乎找到了一解心中鬱結的機會。
「邊個話自由市場係萬能㗎？乜你以前有咁諗過㗎咩？做人做到你咁天真咁儍，都算異品囉！所以我時時話，做官嘅多數不切實際，真係有根有據㗎！我都係話多數人啫，唔敢一竹篙打一船人。不過，我肯定貴國做官嘅，個個都識搵錢，而且手段比華爾街銀行家有過之而無不及，絕對唔係不切實際之徒。」世民一向對無賴都不會客氣，對EL這種人，更不用留手。
一山還有一山高
離開政府前，EL是東南亞某國的財長，該處至今仍然是貪污成風，EL也難免是戴罪之身。其實過去幾年，世民偶爾在經濟論壇中遇到此人，也盡量避開他，免得有失身份。
「嘿！如果你哋唔係相信市場萬能，點解要反對干預？如果你哋唔係相信市場萬能，又點會搞出今次嘅大頭佛出嚟？」EL仍然理直氣壯，彷彿一生人都沒有看見過賄款，沒有聽過貪污。
「先生！如果你唔明白點解我哋反對干預，就唔該你照吓鏡。我都話咗唔認為市場係萬能，係你哋人前人後話政府萬能啫。又或者喺貴國，只要有錢同埋識得一兩個高官，就真係乜都得，變相真係政府萬能囉。我出身長大嘅香港，已經好耐無呢支歌仔唱，有人話因為係咁，我哋先至有今日嘅成就，而呢啲先至叫做真正自由市場典範囉！」世民是心中有火。
「美國政府都出手干預啦！你哋仲死撐乜嘢？」EL和其他大政府信徒一樣，喜歡提出些沒有邏輯，但驟然聽來好像有道理的問題。
自由市場真典範
「莫非你嘅意思係︰美國政府出手就等於絕對正確？唔似你班社會主義信徒一向嘅立場喎。再講，件事都未完，你又可以肯定美國政府出手真係有用？而且如果當年唔係你哋班大政府信徒要求有CRA*，又點會有次按同埋其他嘅一連串事件先？」世民知道官僚和政客不敢面對CRA的事，只會將責任推到市場參與者身上。
「我唔知道乜嘢係CRA！我淨係知道華爾街銀行家貪心，搞到全世界都要受苦！」EL終於露出了馬克斯《資本論》的書角。
「啊！你可以第一句就乜都唔知，接住就乜都唔使知。呢啲咪叫屈機囉！返去做足功課先啦，乜都上綱上線，你唔醜，你啲同胞都覺得醜。仲有啊！唔該以後唔好再叫美國做自由市場典範，香港先至係！」
利世民
註:*CommunityReinvestmentAct亦是次按問題的根源