行為和裝扮都十分出位的藝人八両金因炒燶股票，遭太太八両菜嫌棄，98年離婚後，八両金便開始帶子洪郎生活，兩父子相依為命。他為了彌補兒子葉小霆（八両仔）在破碎家庭長大的缺憾，工作以外，全部時間貼身又貼心照顧兒子，對囝囝盡是溺愛的他更自爆為𠱁囝囝吃飯，不惜買魚翅撈飯給他吃。在八両金心中只希望兒子做個健康快活人。撰文：比華利
從小到大，八両金（原名葉競生，但最近改名為葉子申）都愛把寶貝兒子八両仔打扮成自己的翻版，兩父子每次亮相必穿上一式一樣的父子裝。現年53歲的八両金一貫造型力保出位招牌，但要年僅13歲的八両仔捨棄時下年輕人的潮裝，穿上誇張的父子裝，卻顯得有點異相。
欲當時裝設計師
問到八両仔是否真心愛穿父子裝？他日前接受訪問時說：「梗係，因為爸爸嘅服裝，我有份設計，我覺得好靚好型喎，反而我覺得𠵱家興嘅時裝皺掹掹，一啲都唔好睇。」就讀中二的八両仔已立志做時裝設計師，希望將來學以致用，把父親在內地的時裝生意發揚光大，聽到囝囝這番說話，八両金感到非常安慰。
八両金表示一生最遺憾是不能給囝囝一個完美的家庭，他與前妻八両菜在98年離婚，此後他便父兼母職，八両金心酸的說：「直至𠵱家，我都唔明佢阿媽點解要咁狠心離開個仔，始終係佢肚嘅一忽肉，佢同我簽晒離婚手續後就冇晒蹤影。05年囝囝打過電話畀佢，竟然一聽就cut線，呢件事之後，我哋對佢死晒心啦。」八両金曾多番希望與前妻再續前緣，他說：「我曾經希望佢可以為個仔留低，就算同我離婚都冇所謂，我好想囝囝童年得到媽媽照顧。」
對媽媽毫無印象
對於八両菜的無情，令兒子對母親毫無印象，他說：「我對媽媽完全冇印象，亦都冇記憶，只係記得佢外形大大嚿。」相對八両仔非常孝順父親，他說：「阿爸係我最尊敬嘅人，如果我將來賺到錢，有三樣嘢一定要買畀阿爸，就係金、車同船，我知阿爸好鍾意戴金鏈，買車係希望佢出入舒服啲，至於買船，我希望可以同阿爸出海玩。」
成為單親爸爸，八両金對囝囝更溺愛，他自爆從小為着𠱁囝囝吃飯，不惜買魚翅撈飯給他吃，八両金說：「佢一食魚翅就可以撈幾碗白飯。」他又絕對認同廣告對白，養育一個孩子要花400萬，八両金又說：「其實計埋條數，點只400萬，連埋精神上嘅支撐，起碼超過千萬。」
對於培育兒子，八両金從沒有望子成龍，他只希望兒子可以做個既健康又開心的快活人，若有能力還要貢獻社會，他說：「我成日同佢講，阿爸條命唔長，睇唔到佢幾耐，希望佢可以學識點樣保護自己，將來唔使靠人。當然我都要求佢讀好啲書，因為有學識先有將來，考試唔使求分數，但必須盡全力，咁樣將來回望都唔會後悔。」
未遇上再婚對象
八両金早年曾考慮再婚，但卻遇不到合適女伴，他說：「我曾經好想快啲再婚，幫囝囝再添個細佬或者妹妹，好等佢將來有事都有人商量，偏偏就遇唔啱，𠵱家惟有隨緣，我都唔強求。」擁有傳統思想的八両金期望兒子長大，為家開枝散葉，可是八両仔卻抗拒地說：「阿爸，我暫時未有呢個諗法。」
倒模父子裝
八両仔自幼的髮型及衣着打扮已被爹哋八両金塑造成翻版，難得八両仔對於父親的獨特品味讚不絕口，每次兩父子外出均由內襯到外，猶如行孖咇般。
育兒心得：學習樂器增值
八両金希望兒子長大後當藝人，但八両仔卻志不在此，他希望當時裝設計師，不過八両金認為一個人若擁有知名度的話，無論選擇發展那一方面的事業，都可以收事半功倍之效，他說：「我希望囝囝識唱吓歌，有機會上台表演吓，帶歡樂畀人。」
幸而八両仔對音樂也很有興趣，他說：「我已經識彈結他，但鋼琴因為停咗一排，𠵱家先再學番，進度比較慢，不過我會努力。」八両金表示最近花了數萬元給囝囝添置樂器，他說：「講真最貴嘅我又買唔起，但我會量力而為，將最好嘅都畀晒個仔。」
