噚日睇電視，有大班買咗雷曼兄弟迷你債券嘅苦主，操去政府總部抗議，一位伯伯將自己1000萬積蓄買咗呢啲所謂嘅迷你債券。原來敏妮公司都有幾位同事嘅朋友或者屋企人，買咗呢啲迷你債券，而且唔係細銀碼。唔知大家睇電視新聞時有冇發覺，啲苦主大部份係上咗年紀嘅人士、退休人士或者係家庭主婦，敏妮嘗試解釋呢個現象。
某日你去到銀行，見到相熟嘅銀行職員，同你講港元定存得一厘息都唔夠，但隻迷你債券，有成七厘息，相信吸引唔少以收息為主嘅投資者，何況同你推介嘅唔係保險、地產、股票經紀，而係大銀行職員。加上按風險排列投資產品，存款最低，之後就到債券，跟住股票、外滙、衍生產品等，所以聽到債券噃，以為同存款差唔多咁穩陣。何況呢隻債券表面睇，唔係一般奀雞企業出嘅，而係有百幾年歷史，美國大型投資銀行出嘅債券。
實以CDO作抵押
問題係，你估推銷呢隻產品嗰位職員知唔知呢隻債券，抵押品係乜？敏妮睇過呢啲迷你債券嘅發售章程，清楚寫明「迷你債券的抵押：以AAA評級的抵押債務證券（抵押債務證券）作為抵押……」唔知乜嘢係抵押債務證券，唔緊要，抵押債務證券英文簡寫係CDO。近期大家對啲3個英文字母串成嘅簡寫應該好有感覺，就算唔知係乜，都知唔掂得。簡單啲講，係以債券形式包裝嘅衍生工具。
跟住落到賠償嘅問題，大家應該有心理準備嘞！作為債券持有人，本來係債權人嘅身份，但就好似你向銀行借按揭咁，你用層樓做抵押，你還唔到錢，銀行就會收你層樓。
家陣發行債券嘅人還唔到錢，你雖然都可以算係債權人，但就好低層次嗰隻，佢有錢都先出糧畀員工，再還埋畀啲揸企業債券嘅人，好似嗰啲話持有雷曼債券嘅大陸銀行先，有錢剩先到你啦。問題係，如果佢有錢還得晒畀呢班主要債權人，都唔使破產啦！咁你認為收得番錢嘅機會有幾多？
經一事長一智
呢單嘢凸顯香港監管制度有問題，究竟銀行係咪銷售手法有問題，好值得追查，如果查出真係銀行嘅問題，敏妮好支持投資者去抗爭，政府一定要正視事件。不過，即使今次政府插手解決事件，投資者要相信呢個世界冇一勞永逸嘅方法，最緊要自強，好好學習各類理財知識，咁先至係自保良方。
溫敏妮
http://wanmanli.com/blogs/