葉劉噚日出席關注城市規劃大聯盟公聽會，有市民話不滿官商勾結嚴重，又以當年嘉亨灣事件做例，點知葉劉問返轉頭：「嘉亨灣喺邊度？」搞到現場笑聲四起，個市民就好有智慧咁答佢嘉亨灣係喺西灣河，「即係梁展文批地嗰度」。葉劉事後解釋，話當年嘉亨灣事件爆發時，佢正身處外地，加上件事唔屬佢政策範疇，所以唔知都唔出奇。
劉秀成被人噓
葉劉其後話自己住喺堅尼地道，會受合和中心二期嘅未來發展影響，佢會好仔細去研究，主理呢個計劃嘅合和實業聯席董事總經理胡文新噚日唔在場，唔知佢知道會有乜感覺。至於同場泛聯盟劉秀成喺公聽會後段發言時，就話過去唔知市民對城規會有咁多不滿同關注，連社會有乜嘢聲音都唔知，立即惹來現場噓聲四聲。
雖然葉劉、同劉秀成噚日一個被人笑，一個被人噓，但佢哋聽完一個又一個市民訴苦後，都舉手贊成要城規會盡快改革，仲要減少整體發展密度改善質素，結果臨尾都贏番唔少掌聲。