上期說過大市若再向下，讀者不妨嘗試撈弱勢股博反彈，上周趁大市下跌，相信有儲貨的讀者可能已經執中個底，筆者的淡倉亦在上周四上午獲利平倉。
周五反彈強勁，但若閣下仔細觀察，不難發現大升特升的都是近日被瘋狂斬倉的超級弱勢股，筆者上期指出，反彈要博弱勢股，中移動（941）、中資銀行股及內房股等等，過去一星期被沽到體無完膚，斬倉越急，反彈便會越強，所以上述股隻在上周五一彈便是一到兩成不等，反而抗跌股就無運行，如大家樂（341）及維他奶（345）等，上周五只升得些少，後者更是升完都補唔番，所以筆者才講博反彈便要博弱勢股，但我上期亦講過絕不能太貪，不少個股上周五已由底部回升3成以上，應該先行套利。
熊市V彈有保留
讀者可能覺得詫異：「唔係啩？今次反彈仲勁過去年817，上次817後大市急升一萬點喎？」筆者在817撈正個底，當然印象深刻，但今時唔同往日，上年還是牛市，與熊市做法截然不同，現在雖然貌似V形反彈，但要做到真正V彈再展升浪，談何容易？牛市V彈，可以睇好，但熊市V彈，便有保留。
記得上周四早上，報章雜誌仍是壞消息滿天飛，例如次按會進一步蔓延，各金融機構手持大量衍生產品，一間投資銀行倒閉，便會拖垮整個金融市場云云，筆者覺得亦無誇大。但來一日反彈，一天急升，坊間報章便轉軚唱好，列出一堆好消息，例如雷曼會被收購，大摩有難亦不愁沒有買家，中央又出手救中資銀行，減印花稅，各國央行大舉注資，仲有……嘩，連士佳都寫得出咁多好消息，即係人人都知，咁好消息仲邊有市場？
仍有機會再尋底
市場先生有個習慣，便是經常將消息的影響誇大，因為人沽你又沽，人買你又買，市場反應便會放大，好消息如是，壞消息亦如是，所以好消息一出，投資者很容易便會忘記之前的壞消息。政府出手救市，目的是在於穩定市場，將破壞力減低，並不代表政府出手，市場會即時好起來。
在這些大時代，不能被消息蒙蔽，急跌時不要太淡，急升是更不要看得太好，現在反彈已經甚多，所謂有食唔食、罪大惡極（適用於熊市），市況反覆，實在不宜太貪。金融危機的影響將逐步浮現，士佳就選擇慢慢再Put，因大市仍有機會再尋底，升完3000點仲尋底？大型上落市嘛！
張士佳