經常標榜自己代表年輕人嘅民建聯陳克勤,噚日出席一個年輕人電台節目時慘成箭豬,一班年輕人關心嘅問題,包括呢位過去月𢭃7萬公帑嘅人兄,究竟喺特首辦做過乜,同埋點解佢要叫由內地返港嘅青年驗尿等,咁做可以阻嚇青少年北上索K咩?
陳解釋,民建聯「唔係提出驗尿嘅人,呢個係海關提出嘅建議」,講到喺特首辦做過乜,佢就話有保密原則。令到全場爆笑嘅,一定要數民主黨鄺俊宇,佢喺節目上指陳克勤當選後最大功績,就係團結網民,因為網上好多人批評佢,又要求陳就指長毛係「一分鐘議員」向全港市民道歉,被人圍插,塊面好燶,但拒絕道歉。