由「FF之父」坂口博信力撐微軟起，佢每個舉動都受外界關注，雖然登陸XB360頭炮《藍龍》唔係好標青，但總算為呢部外國主機打開日式RPG缺口。如今續集推出，但唔好意思，平台竟唔再係家用機，而係支持度更高嘅NDS，玩法亦滲入咗濃厚實時戰略要素，等大家要齊齊拎起支筆，Call個影出嚟打餐飽！
文：陳福榮
改頭換面進軍NDS
年幾前出嘅《藍龍》，可當成微軟出錢包起坂口間公司，為360推出嘅獨佔作品，但𠵱家《藍龍Plus》嚟到NDS無可能仲掛住微軟個牌頭咁大逆不道㗎！話晒假假哋都係競爭對手，正如你唔會見有老任或微軟嘅Game會響PS3度賣。因此𠵱家改為坂口個老友AQInteractive做發行商，但鳥山明嘅角色原案與植松伸夫嘅正爆音樂全部健在，世界觀當然係沿用原版，講述主角Shu居住個星球喺上集1年後居然分裂成兩半，從而衍生無數名叫「Cube」嘅謎之立方體建築物。Shu無可避免要同班出生入死戰友，再次發動影嘅力量與敵人周旋。
實時控兵考反應
《藍龍Plus》標榜住最多手執16名同伴，跟同樣能操縱影獸嘅機械軍團決鬥，從中逐漸解開各個不解之謎，但玩法再唔係原本傳統到暈嘅回合制指令RPG，而係講求迅速應變嘅實時戰略。玩家要妥善控制各部隊嘅行動路線和攻擊方向，擬定適當行動方針嚟作判斷，雖然整體速度及唔上《魔獸爭霸》咁快，但絕對唔係慢吞吞亂打都過到骨，有需要仲可發動影獸全力一擊掃場。而且為咗增添收集及育成要素，可憑敵人掉落或寶箱中取得嘅不同部件，製作成機械人以其人之道還治其人之身。
新舊角共冶一爐
過往班正義主角如勇敢小男孩Shu、成個女海盜咁嘅Zola等，都會繼續喺本作佔有重要戲份，與此同時「貓貓族人」Marumaro啲細佬妹同埋神秘少女亦會加盟，佢哋同樣擁有呼召影獸嘅能力。不過邪惡勢力並唔嘢小，之前經已出過場嘅機械軍團備有紅色影龍，接着再嚟威力更強嘅毀滅尖兵，加埋曾係手下敗將但復活番嘅四天王，咁叠馬唔怪得要搵咁多新角幫手啦。
機種：NDS
廠商：AQInteractive/Mistwalker
類型：SRPG
人數：1人
價格：約$330
