轆Book：尖子揸Bond車扮老占

AstonMartin不嬲係占士邦座駕，大銀幕裏面嘅占士邦係個打不死超人，今日變身電視機裏面嘅波牛，《尖子攻略》裏面嘅梁烈唯，唔止扮17歲尖子得，扮占士邦都一樣掂，呢啲，咪就係戲囉。

記者：梁美甜
攝影：陳盛臣

好重特務Feel

AstonMartin係占士邦座駕，唯唯係唔係占士邦迷？「唔係，係玩電子遊戲識呢個牌子，仲要次次都超難揸，所以好想揸。」一見最新型號2009年款DB9，唯唯呆咗幾分鐘，「嘩，真係好型。」坐上車，東摸摸西摸摸四圍望，又屈腳試坐Dogseat，之後又研究副偈，「係咪鋁合金？」又行去車尾彎晒身望尾喉泵把，「車底係咪有防滾架？個防滾架係咪有Balancing作用？」口脗幾專業，可見佢真係好鍾意車，兼有研究㖭。
比上一代，新DB9轉用水晶EmotionControlUnit，簡單啲講即係車匙，只要將印有AstonMartin嘜頭嘅水晶方塊，放到中控台同樣印有嘜頭嘅位置，方塊會自動沒入，再按StartEngine就可以撻車，好有高科技特務Feel。「似唔似《變形金剛》入面嘅能量火燄？𠵱家好多車都有所謂KeylessGo，呢個EmotionControlUnit勁，勁喺邊，勁喺唔隨波逐流，成件藝術品咁，有Class又有Taste。嗱！入屋隨便放喺枱，啲人見到實會問：『乜AstonMartin出咗打火機咩？』車匙嚟㗎，唔識嘢！」唯唯你又幾搞笑喎。

路噪低音響靚

相對於上一代，新車多喺細緻位着墨，除鬼面罩、門邊鏡、19吋合金胎軨同全新水晶EmotionControlUnit外，最犀利係調校過副偈，令馬力同扭力分別提升咗20匹同30Nm，加埋Touchtronic2波箱，轉波加速快而爽，0至100公里需4.8秒，只比手波相差0.1秒，強到呢！
唯唯試車有感：「加分，車身剛性好高，高速入彎無甩過，軸距、佈局同重量分佈做得好，路噪又低，可唔可以試埋音響？」講完就左扭右扭，上㩒下㩒，「再加分，好，行緊車都完全唔受引擎聲影響，真係要用心品味佢嘅細緻。坐住嘆，未必有衝動踩地台油，但有人挑釁，我實踩行油，信得過部車發揮得好好。仲有樣嘢要讚，好多跑車都係揸嗰個享受，做乘客唔知你幾時畀油，唔扽到飛天至出奇，但DB9就唔同，揸嗰個同坐嗰個都舒服，唔會扽。」