紅磡的一條差館里，除了新正頭因為觀音借庫，人頭湧湧外，平日總談不上熙來攘往。想不到董敏莉（Monie），卻是這裏默默經營了十年的郁香園的忠實粉絲，還跟小記讚了它不下十次。鏡頭前跟蘇師傅「峰生水起」，鏡頭後的她都有識飲識食一面。
記者︰王震遠
攝影︰梁細權、陳盛臣
Hair：JamesWong@CG
Accessories：http://www.ideaxstore.com
中西日都煮
阿媽教落，識煮飯就係好女仔，那Monie一定係合格。Monie閒時鍾意煮番兩味，真係幾為食，乜都愛煮一餐，中、西、日通通唔放過。「有次朋友喺大陸帶咗啲非常出名嘅霸王花米粉畀我，啲米粉條條攣身，賣相幾似公仔麵，原來好爽口。平時我會配XO醬、椰菜同叉燒一齊煮嚟食，好夾好好食。」愛入廚的人自然識食。
一試難忘
在Monie眼中，食物無平貴，只要好吃就是。「平時我鍾意周圍捐窿捐罅搵嘢食，最鍾意食平嘢。有時有啲舖頭好罨耷唔起眼，其實啲嘢好好食；有啲裝修得好靚，其實好睇唔好食，賣得貴只係食裝修。」Monie對飲食略有心得，問她有甚麼好介紹，「土瓜灣有很多正食店，但我首選郁香園。」她遇上此店全屬機緣巧合，某晚深夜經過附近，四周沒有其他食肆，見郁香園還未打烊，便入店醫肚，豈料一試即愛上，還不斷向身邊的親朋推介，更一致好評。「嚟郁香園我會叫四寶米粉，呢度啲丸同外邊食到嘅唔一樣，其他舖頭食完無印象，唔會再回味，但呢度墨丸好滑，咬落唔多粉，食得出好足料；黑椒豬肚丸味道好特別；最鍾意食佢啲米粉，外邊食到嘅都係滑身，而我鍾意呢度食到嘅係嚡口、有咬感。仲有最搞笑係個名叫四寶，但係有五樣餸！」Monie一直都想買肉丸外賣，返屋企打邊爐，不過天氣尚熱，最終都沒付諸行動。不過想不到如Monie般的靚女，也會不拘小節到如此傳統食店嘆她的「最愛」，Monie果真識食！
四寶米粉$18
四寶有魚餃、牛丸、豬肉丸同墨丸，牛丸師傅每朝用鮮牛肉手唧，中間有氣孔，彈性強非機製可比；湯底用牛骨熬製好清甜。
郁香園正宗潮州粉麵家（27660669）
紅磡差館里9號地下1號鋪
數碼港姬子皇朝──亁炒牛河
從事娛樂圈食無定時，甚至無啖好食，如果附近食堂水準好算走運，否則還是乖乖吃飯盒。前陣子到數碼港拍外景，久旱逢甘露遇上姬子皇朝。最令Monie讚嘆的是那碟亁炒牛河，整隊工作人員都趕着拍攝，閒置着牛河由有煙變到無煙，加上冷氣大，攤凉了個半鐘以上。以為經已變得杰撻撻油腍腍，入口發覺依然可口，令Monie留下深刻的印象。原來全因師傅煮食一向不落多油。「仲有必試呢個XO醬，因為無得外賣，我哋隊Crew知道再去拍嘢，有人帶埋盒去裝XO醬走！」師傅平時預先準備好一鍋XO，只供堂食，非用光了都不會再煮。由於製作很花工夫，所以不能經常準備好多存貨。
亁炒牛河$98
炒亁炒牛河最重要掌握火候。本地鮮牛醃過後連洋葱爆香，河粉炒得夠透，亁身又彈牙。
XO醬炒翠玉瓜豬頸肉 推廣價$88
XO醬用亁瑤柱、金華火腿和馬友鹹魚等混合而成。配合爽口的豬頸肉，味道香而不太辣。
頂級蟹粥（例牌）$280
粥底加了皮蛋和腐竹，生滾新鮮奄仔蟹，蟹味完全混入白粥裏，並有葱花等配料提升香味。
姬子皇朝（29899338）
香港數碼港道100號數碼港商場102號舖