呢輪大陸奶粉、牛奶相繼出事,家姐牙痛咁聲,佢話之前成日跟啲師奶去大陸深圳掃國貨,買咗唔少蒙牛同伊利奶,仲係一箱箱咁掃,貪喺深圳買平過香港兩、三成噃,𠵱家擺滿晒喺屋企。家姐話,喺香港超巿買憑單就可以退啫,𠵱家喺深圳買,退唔到錢,都唔知點算。
醫生:唔應該試
佢話,有啲師奶想將啲蒙牛奶當洗臉奶用,甚至冲凉,好過倒咗去咁肉痛吖。佢哋覺得唔係食落肚,應該冇事。
雖然唔係內服,但啲奶有毒外敷都好有問題。小妹噚日即刻問吓家庭醫生關嘉美。關醫生好緊張話,以前根本冇人會將三聚氰胺呢啲工業用料用喺奶粉、牛奶度,但不法商人將啲三聚氰胺加喺啲奶粉,當啲BB係實驗品,結果發現三聚氰胺毒害咁犀利,會令BB患腎結石。你話將呢啲有毒奶當洗臉奶,啲三聚氰胺會唔會經皮膚滲入人體,真係唔知,因為冇人試,冇科學證據證明,「但係明知有毒,雖然畀咗錢肉痛啫,都唔應該試。唔好話攞嚟冲凉、洗臉,連洗手、洗腳都唔好制。」
關嘉美又好勞氣話,中國人衰在逆來順受,明明係對方唔啱賣有毒奶,消費者都想用其他方法用咗啲奶去,「我覺得應該向對方追究到底,爭取消費權益,拎番去內地要求退錢。仲有,今次呢件事教訓香港人,唔好貪平返大陸買嘢。」
電郵:mailto:[email protected]
逢周六、周日刊出