台灣組合南拳媽媽嘅成員彈頭（宋健彰）前晚同女友拉埋天窗，完成終身大事咁高興，所以唔少佢嘅圈中朋友都特登去祝賀，好似周杰倫同房祖名都有去飲喜酒。
喺度等開席嘅時候，房祖名就最巴閉，因為佢大受現場嘅女士歡迎，全晚都俾啲靚女同辣妹包圍住，而佢睇嚟都好受落，照單全收。
幾杯落肚嘅祖名，玩到散席都未想走，等到啲傳媒走得七七八八嘅時候，佢又再發揮個人魅力，走去同一位性感女郎玩影合照，之後又同一位着超短裙、騷長腿嘅靚女交換手機號碼，總之祖名鬼咁風騷，俾啲女仔大包圍，大家有傾有講，可謂艷福無邊。
周杰倫大玩魔術
而另一位嘉賓周杰倫，佢好孝順咁同埋媽媽葉惠美一齊嚟，佢仲喺現場顯身手，表演「新娘魔術」，搶晒一對新人嘅鏡頭，吸引咗全場賓客嘅目光，喺散席後，周杰倫仲陪住媽咪走先，未有留低繼續玩！