轆Book：<br>辣跑推背　飆到甩髮

轆Book：
辣跑推背　飆到甩髮

傳聞一則——某記者年初喺美國試Mercedes-BenzSL63AMG，一踩油，背脊即時撞向椅背兼貼到實，佢有幻覺以為自己揸緊戰機——自此，我個腦有晒呢個畫面，齋諗已經好興奮，等呀等，終於等到SL63AMG正式登陸，係時候印證有無咁勁。

記者：黎頌詩
攝影：陳盛臣
模特兒：Tina（StageModel）

疑似藝人斷正？

意外發現，做乜架SL63AMG上面有個紅髮女人，望真，咁似千嬅嘅？同邊個搞緊地下情呀，男主角又係邊個呢？扮鬼扮馬莫非想掩人耳目偷會情人？不過咁，呢部車咁勁，一踩油即飆住去，狗仔們，食風啦。

笠個紅髮，斷估無人認出？

■型爆V形車頭，好有破風狂飆意味。

■車側指揮燈造型獨特，屬AMG系列新Design。

■星形19吋合金胎軨，感覺相當輕巧。

引擎咆哮先聲奪人

搞爛Gag罷了，實情阿疑似千嬅是模特兒Tina。
搞完Gag，急不及待跳上車，一撻火，SL63AMG的威勢即時爆發，車尾響起不安份的咆哮聲，6.3公升V8引擎可真先聲奪人，似要燃點你戰意。戰意旺盛，當然要挑戰最強RS（RaceStart）行車模式，踩油，傳聞──成真！瘋狂動力暴現，強烈推背感即時響應，嚇到Tina即時嘩嘩聲，就在這刻，A貨千嬅的火紅假髮，被強勁氣流扯甩。
經AMG操刀強化的動力，勁度本已毋庸置疑，全新SL63AMG配搭全新7前速AMGSPEEDSHIFTMCT半自動波箱，配合軚環下的加減波撥片，擺明賣弄非一般駕駛樂趣。波箱反應迅速，有三種不同行車模式，除一踩油已經可以把動力全數輸出的RS模式，還有S+（Sportplus）與M（Manual）模式，波箱反應會因應不同模式增減。看數字，SL63AMG車身比SL350重145kg，但在520匹馬力推動下，0-100km/h加速只需4.6秒。

■新三幅式軚環，手感和觀感更配合AMG身份。

■內櫳鋪排基本不變，桃木裝飾變成碳纖，強化跑味。

■大大個天窗，獻上大自然氣息。

■軚環後有加減波撥片，提升操控快感。

■行車模式選擇掣，RS模式的推背感，令人回味。

■白底紅針錶板，資訊清晰。

開篷感受辣味

辣跑化內涵，理應有火辣外表包裝，但SL63AMG外表英氣得來不霸道，雖然風格與普通版大致相若，但也有不少細緻改動。首先，V形車頭為強勁AMG版添殺氣，頭燈改為圓頭L形，側燈換上AMG最新設計，前輪後的風口位，也加上「6.3AMG」標誌以示身份。
跑格最強烈的要數車尾，巨型擾流板、粗壯左右四出式尾喉，辣到出樣！內櫳則稍欠驚喜，整體格局跟普通SL63一樣，只是本來賣高級感的桃木裝飾換上跑味碳纖，三幅式跑車軚環配多對AMG跑椅，叫谷了點跑味。其實要感受辣味，就一定要開篷，邊開車邊聽住尾喉轟轟作響，強風撲面，速度帶來的推背感覺，會更實在。

■風口位有型爆「6.3AMG」標誌，跟車身顏色唔同，零舍搶眼。

■AMG跑車桶椅，稍硬，帶出一身跑格。

■頭枕的Airscarf屬Option配備。

Mercedes-BenzSL63AMG規格

引擎：6,208ccV8DOHC
馬力：525hp/6,800rpm
扭力：630Nm/5,200rpm
傳動：7前速半自動波
車價：$2,088,000
查詢：Mercedes-BenzPerformanceStudio（25948128）