盛傳年底結婚的李嘉欣昨日出席水晶活動時，直認最愛亨亨，更指不會在公開場合宣佈婚訊和細節，以免牽連他人，令自己變罪人。股市反覆動盪，嘉欣揚言已重創，身家大縮水六成，要密密出騷搵錢。
李嘉欣和許晉亨拍拖以來密密晒恩愛，盛傳兩人12月結婚，嘉欣前晚出席活動答得模稜兩可，昨日她又應水晶品牌Swarvoski亮相ENLIGHTENED–INSPIRATIONS2008活動，同場陳嘉容、莊思敏等行首飾騷，嘉欣壓軸出場。
「要勤力啲搵錢」
嘉欣獲Swarovski高層DanielCohen送贈彩色水晶鎖，被指鎖扣適合她鎖住亨亨，她即轉移話題說：「係呀，我啲股票鎖住晒至真，我𠵱家啲身家下跌咗六成，最傷係平保（2318），我100蚊買，𠵱家得番40幾蚊，仲有招行（3968）、交行（3328）都好傷，傷就傷，但冇影響心情囉，我要勤力啲搵番啲錢先！」有人建議她找亨亨補貼，她說：「我想靠自己，同埋我哋唔傾呢啲。」
嘉欣透露會和Swarovski有合作計劃，問她可會為自己設計嫁妝？她說：「睇情況啦，唔一定要，我由細到大都冇諗過呢啲嘢，結婚只要有一個好鍾意嘅人就夠，其他只係配件。」問她找到最愛未？她說：「你話呢？」
問嘉欣是否怕亨亨不是自己最鍾意的人？她即表明心迹說：「唔會有人鍾意得過佢（指亨亨）。」她的婚訊被傳得十分混亂，問她為何不公開婚期？她即說：「我唔會避，但都唔會喺公開場合講，怕好多嘢牽連，會成為罪人。」
「着少啲都見過」
嘉欣行騷時，2007manhunt世界模特兒大賽冠軍鄭宇光在她面前除衫解鈕展示首飾，她即避而不望，她事後澄清並非不敢睇男模，她說：「着少啲我都見過，身體接觸都得，我好專業㗎！」
採訪：RitaLeung
攝影：MatthewLam