光良將於11月在台灣小巨蛋及香港的StarHall舉行演唱會，之後他希望申請紅館檔期在港開騷，到時更可加入一些新元素給香港的歌迷。光良另一個心願是推出一張廣東大碟，以報答香港fans對他一直以來的支持。
光良的巡迴演唱會選擇了香港作為第一站，他將於11月和黎明及衞蘭於StarHall各演一場，之後他會到台灣小巨蛋與歌迷見面，今次是他入行以來第一次在台灣舉行賣票演唱會，故此他的心情十分緊張。
「做足100分」
光良以廣東話說：「台灣睇演唱會嘅風氣同香港好唔同，唔係成日有賣飛演唱會，唔似香港咁個個月都有騷，而且好多歌手只會開一兩場，唔會連開十幾場，所以我一定要做足100分，唔可以令等我咁多年嘅fans失望。」
完成台灣演唱會後，光良希望申請紅館檔期，因為他十分喜歡這個地方，他說：「紅館呢個地方好似係一個歌手嘅指標，加上同fans可以好close，會畀好多好大反應台上嘅歌手，真係好high，我好懷念呢種感覺。」
演唱會後，光良便埋手籌備新專輯，他最想推出一隻廣東大碟，不過暫時仍未有構思，他很想邀請林夕為他填詞，他說：「香港嘅fans真係好支持我，我好想送一份禮物畀佢哋，我覺得出一隻廣東碟係最好嘅禮物，不過呢個計劃仲喺構思當中。」
渴望睇北極光
由於光良有一連串工作在身，他想有一個長達一個月的假期，好讓他找靈感寫歌，他最想去的地方是埃及和北極，他說：「埃及呢個地方我想去好耐，但每次都係得幾日假期去唔成，同埋我好渴望睇到北極光。」
採訪：李珮洳
攝影：葉君海 髮型：Liu（HairCulture）
化妝：江中平（A&VMakeupSchool）
服裝提供：C'N'C
場地提供：Nobilduca（海港城）
