𠵱家啲AV音效真係好鬼犀利，特別睇戰爭片，成個廳子彈橫飛，炸到嘭嘭聲。有時夜得滯又想睇戲，唔想嘈到人又想聽到環迴音效，一個優質嘅耳筒就好重要。但巿面嘅耳筒五花八門都唔知點揀，好在消委會啱啱測試咗29款耳筒，由大型嘅罩耳式耳筒、壓耳式耳筒，以至小型嘅耳內式耳筒、入耳式耳塞都有。
消委會老友話，測試呢啲耳筒靚唔靚聲，除咗進行連串技術測試，仲要檢測耳筒能否忠實地播放原音嘅頻率響應、總諧波失真等，所以搵咗五位專業音樂發燒友即場試用。
經過連番比拼，最靚聲嘅係罩耳式嘅DenonAH-D1001（圖），五個發燒友一致認為該耳筒音色均勻，高低頻都好出色，整體評分為最高嘅五星，售價$990；其次係消噪罩式耳筒樂聲牌RP-HC500（$1,280）同SennheiserPXC350（$3,300）。想買一啲較細嘅耳筒，評分較高有UltimateEarsmetro.fi2（$699），或者係SennheiserMX760（$450）/MX460（$200）嘅效果都唔錯。
老友提醒，用耳筒聽音樂，耳朵接收嘅音量比用揚聲器仲高，所以戴耳筒嗰陣要調至適合嘅水平。
逢周五刊出