周中歐洲賽打到飛沙劈石，車路士、利物浦順利贏波，曼聯同阿仙奴就和波，緊接又要踢英超，仲有幾多貨賣好難講；今期早飛重心就避開呢班參戰歐洲賽球隊，博新特蘭主場對米杜士堡呢場東北部打吡戰開「大」！
米堡門神有求必應
近年東北部打吡雖然同爭標形勢冇咩關係，不過戰情都好激，上季新特蘭就先憑米拿補時階段入波，作客2:2迫和米堡，之後主場又險勝3:2；呢場波「主客和」我就唔識估，但深信開到入球「大」；以新特蘭人腳，高佬中鋒堅韋尼鍾斯雖然因傷缺陣，不過唔愁冇炮手，施斯、廸奧夫、戴利梅菲全部識入波。
米杜士堡今季唔單止勝負好路，主場贏晒作客輸晒，亦都開緊條長「大」路，無獨有偶4場都開總入球3，未爆路前要繼續追；前線一對先後喺荷蘭搵食嘅美度及艾方素極為合拍，端基因傷唞一個月都冇有怕；不過後防同新特蘭一樣脆弱，端布爾呢位23歲門將，打英超真係唔夠班，上仗輸畀樸茅都因為佢，有端布爾打正選，米堡都幾難唔失波。
再追華倫3:0靚波膽
冷腳方面，博周日西甲聯賽華倫西亞主場贏奧沙辛拿3:0波膽；華倫近期係小弟愛隊，聯賽兩場都未輸過盤，上仗作客艾美利亞，兩番落後都可以追平，韋拿繼續神勇；近4次主場對奧沙辛拿全勝外，奧軍更一球都未入過，以華倫揭幕戰已淨勝馬略卡3:0，一於再追呢個波膽。
〈早飛倉〉
主菜：星期六24新特蘭
大（2.02）@500
混水摸魚過關：星期六24新特蘭[3]（4）x星期日33華倫西亞勝3:0（13）2x3@100
今日早餐價錢：-$800
早飛倉結餘：$96,515
規則：$100,000本錢，每日買早餐最多動用$5,000，最少$1,000，逢周二、五起身食早餐。
周末早飛超級重心
星期六11 FC悉尼勝（1.95）
澳職聯本身球隊班底已經參差，阿德萊德聯周中更作客日本嘅鹿角打亞冠盃8強，腳都軟作客FC悉尼聽任人魚肉。
星期六64 里爾勝（1.75）
里爾喺法甲已見復蘇，上仗賽和索察，之前主場更可擊敗波爾多，周六主場對作客歐塞爾，主W在望。
星期日28 艾美利亞勝（1.72）
艾美利亞上仗兩度領先華倫西亞，被迫和欠運，尼格度大勇，以今季西甲升班馬，馬拉加只係平庸貨色，艾美利亞不難全取3分。
難啃早餐
星期日39 些路廸贏唔到
些路廸人腳不進則退，大勝福爾柯克同馬瑟韋爾唔代表好勁，大敗予格流見真章，加上踢完歐聯，周日作客主場未輸過嘅基爾馬諾克，博主隊不敗。