吳卓羲（Ron）、林峯、馬國明和陳鍵鋒等昨日在尖沙嘴宣傳無綫新劇《少年四大名捕》，眾人大玩拋波、跑步機和掌上壓等體能測試，結果吳卓羲的表現最好。
「遺忘我個名」
阿Ron曾與佘詩曼傳緋聞，最近傳出阿佘和鄭嘉穎拍拖，記者笑指阿Ron被「撬牆腳」，他笑說：「千祈唔好講話『撬』呀，除非有人承認呢啲新聞，如果唔係我都係當笑話一則，最好以後唔單止緋聞告一段落，啲周刊雜誌遺忘埋我個名仲好！」他又表示看過報道，他說：「我睇完後都覺得好好笑，影唔到坐同一架車，又冇喺同一個門口走出嚟。」
問阿Ron有否就此事問阿佘？他說：「我呢排見唔到佢，或者留番下次見到佢先笑吓呢件事啦，如果真係拍拖先恭喜佢。」那他覺得鄭嘉穎和阿佘外形相襯嗎？他說：「呢啲唔係我講嘅，但身為演員，男同女外形都要襯，如果唔係點拍拍拖戲呀！」
此外，李詩韻玩拋波時慘食馬國明波餅，更被林嘉華推落地，事後她笑說：「我真係好黑仔呀，個嘴又發炎，玩遊戲又整親，不過我冇嬲，除非整親個鼻嘅舊患。」
採訪：何慧斯
攝影：陳順禎