19歲的Angelababy這一年來，在界模特兒中穩佔女神地位，工作排到密密麻麻。繼7月首本寫真集後，她正籌備第二本寫真集，以及她的處女新歌等。不過，原來這位女模變身前，初中時代只是一個慢熱的學生，全靠打波、做運動開拓女生之間的友誼。
人氣爆燈的Angelababy（楊穎），今年忙個不停。她日前在九龍灣保齡球場做專訪拍照，順道寓工作於娛樂，碌齡當做運動。難得去玩的她，一到場就十足大細路般，嚷着說：「快啲開始啦！」不過，真正落場時，她的球技只屬一般，經常「通渠」，她惟有使出茅招，忽然走到球道最前方打球，十分調皮。
打保齡增進感情
讀書時期已學保齡球的baby，熱愛健康的運動，她說：「喺中三時，一個女同學教我打保齡，覺得好好玩，呢項運動可以增進感情，我同呢個同學仲係好好朋友。平時我一個禮拜會做三日運動，例如去會所做gym，因為做運動對皮膚都好。」初中時，baby指自己是個個性慢熱的女生，因為運動的關係，才令她廣結好友，她笑說：「同啲朋友一齊做運動，好似打保齡咁，因為成日打，所以就有共同語言，傾偈多就會展現出熱情一面。」Baby更透露自己看運動比賽都異常投入，好像上月北京奧運，她就看到感動落淚，她說：「睇林丹打冠軍賽，好緊張，佢贏咗之後，我都忍唔住喊咗出嚟，覺得佢比賽好認真。」
努力做運動戒煙
Angelabay這位陽光少女，早前被爆有吸煙習慣，baby指現時已漸漸戒悼這惡習，她說：「𠵱家好耐先會食一支，但係就算之前我都一定keep住做運動。」戒煙之餘，她也希望能夠完成考車牌的心願，她說：「我已經報咗考車牌一年，一直都未有時間，希望快啲考完筆試先，考到車牌就可以車同事，好似八號風球都唔使驚。」
Angelababy在今個暑假推出首本個人寫真集，大受歡迎，要再版加印，明年baby將乘勢出擊，推出第二本個人寫真，同時也構思將𡃁模晉級，初試啼聲做歌手。她說：「今年寫真集賣得好好，好多謝大家支持，下年我計劃再出寫真，寫真主題仲未諗到，但唔會好性感，希望會一part喺香港影、一part喺外國影，裏面會加一隻single，係我自己唱嘅。」
偶像只有周杰倫
Angelababy十分坦白，她直認自己歌藝一般，但也想一試，更希望自導自演自己的處女MV作，她說：「我希望隻歌拍成MV，初步構思首歌係一隻充滿jazz味嘅英文歌，我唔識創作，但身邊有朋友會幫我構思，我就希望可以自己執導啦！」至於MV男主角，Angelababy卻不益緋聞男友陳偉霆，她笑說：「我諗首歌適合用鬼仔多啲。」那麼外籍對象又會是誰？會不會是她的偶像呢？她說：「冇諗呀，不過我偶像就只係周杰倫一個。」
採訪：羅慧敏
攝影：林德雄
場地提供：香港保齡球城（九龍灣國際展貿中心）
