昨日有消息指李嘉欣和許晉亨其實早於今年6月，已在美國結婚，兩人訂於12月補擺喜酒，但凡有新聞見報，就會「巧合」出席活動回應的李嘉欣，昨晚在中環出席法國珠寶CHAUMET酒會，同場更有林熙蕾、小S徐熙娣、張靜初和韓星韓彩英等，李嘉欣姍姍來遲，活動開始了一個多小時才出現。
李嘉欣如常否認已婚，大耍太極之餘，又講大堆似是而非的答案，她說：「呢個問題講咗兩年喇，我已經唔答喇，我好多工作都排晒喺十月，𠵱家都九月尾，好快就知道啦，你問我個幾月後嘅事，都唔知到時乜嘢事啦，好似股市咁。」
股市冧身家縮水
問嘉欣可是協議不公開婚姻狀況？她說：「我絕對冇默認，唔會刻意收埋，但都唔會拖住手出嚟公開講囉，總之呢一刻都未發生。」隨即拉開話題，指自己因股市下跌，身家縮水一半，不止百萬。
提到何超瓊早前戲言要向前夫許晉亨借種生仔，嘉欣即滔滔不絕說：「我冇擁有呢個人嘅立場，咁要問番佢本人喇，不過，成事嘅話，保證BB係又靚又正又叻嘅精英BB，係一件開心事，講真講笑都冇所謂。」
採訪：LawWaiMan
攝影：ChenWaiOn
