提到去Disco，父母梗有諸多理由反對，又話人多太雜、又怕沾染不良嗜好。但最近流行的親子Disco，由美國紅到香港，攞正PG家長指引牌，不但小朋友踴躍參加，就連父母都忍唔住落場跳番夠本，可謂大人細路都可「舞動奇跡」！
記者：林佩婷
攝影：梁細權
PG音量 播《YMCA》
話明Disco，最緊要當然是個大舞池。由於上次反應熱烈，故今次特地搵個可容納約200人的霹靂大舞池。講明BB舞池，當然跟普通D場有所不同，單是音響就經「PG家長指引」不會太嘈吵，以免傷害幼兒聽覺。但咪以為會就晒小朋友選播Purple姐姐的兒歌，所有歌曲全是70-80年代的流行曲如《YMCA》。有誰共鳴？爹哋媽咪囉，聞歌伴舞變相「PG家長止癮」！高潮位是三組不同年齡的小朋友比賽，從中選出小舞王或舞后。BB熱舞、父母聞熟悉的舊歌也跳起「老舞」，迷幻間，又跟親子掛了鈎。
生日派對 變眾人Disco
搞手Norman同Coco夫婦話，BBDisco早兩年由美國興起，蔓延至英國、日本。「早排想幫囡囡搞個生日Party，偶然Search到呢個BabyLovesDisco，覺得好有趣。本身我哋做幼兒教育，認為有得做，所以就同美國嗰邊傾代理，今年6月首次帶嚟香港，反應超好，人多到要採取潮水式控制。」
加強版 動靜態區
美國的做法只有個大舞池同DJ，日本就最多加支水畀小朋友飲，其他咩都無，但為吸引貪新鮮的香港人，他倆絞盡腦汁，包括將全場劃分動、靜態等不同區域，動態區可以紋身Set頭扭波波；斯文派也有傳統的波波池、甚至乎有影院區靜坐梳化上看動畫。遇上突然臭臭或肚餓？唔使愁，父母可到專用嬰兒房慢慢換片或餵奶，唔使同人逼。「我哋曾去日本取經，發現外國場地都比較細同簡陋，我哋揀場不但要有舞池，仲要夠Trendy，所以增加咗紋身、泡泡機、嬰兒護理室等項目。同時，我發覺親子活動有時只得小朋友玩，大人就好悶，於是決定選播懷舊金曲，務求令大人細路都鍾意。而且現今小朋友多癡肥唔願郁，嚟跳舞周圍走，不知不覺達到運動目的，又學習到群體社交生活之道。」
媽咪有Say
BabyLovesDisco 每月一次
今年6月首次舉行後，隔了3個月才剛於中秋辦第二次，但負責人希望以後每個月可定期舉行，下回的主題是萬聖節，相信會更加狂野好玩!
日期：10月26日（下午3時至6時）
地點：灣仔會展中心會景閣4樓ManhattanTribeca
價錢：
小童$120起（0至12歲）
成人$200起
網址： http://www.babylovesdisco.com.hk
查詢：51338424