幾年前，孫柏文雙失年代告終，返工做低級職員。當年因為對上班文化唔熟悉，所以對同事講嘅一句說話，摸不着頭腦，佢哋好多時都會話：「放假仲辛苦過返工。」呢個周末，作為一個財經口水佬，我卒之領略到箇中真諦。
講真，上個禮拜我都係買政府會出手搞掂雷曼兄弟。就算唔會收歸國有，都會出手保證或補貼雷曼兄弟啲爛資產，跟住就搵人接手。上次BearStearns都係咁，冇理由今次唔係。點知，真係唔係。
問題就係點解上次救，今次唔救？究竟BearStearns同雷曼兄弟嘅分別喺邊？因為《金手指》嘅讀者群當中有好多金融機構管理層，所以不如實際啲問，究竟嗰兩間投資銀行嘅管理層，做過啲乜令到有呢個分別。即係如果你係銀行話事人，點樣逼政府救你。
四大情況政府必救
第一，搞大佢。唔係淨係危害自己間行，一定要危害整個世界嘅金融業。廢廢哋係唔足夠，只摧毀自己間行嘅話，就會冇人救你。一定要定喺個能夠摧毀全球金融業嘅位，一定要廢到累街坊。
第二，搞唔得大，就要爆先。如果雷曼爆先過BearStearns，可能結果已掉轉。
第三，一定要挾持重要對手做人質。BearStearns有9萬億美元衍生工具交易，淨係JPMorgan一個對手，已佔四成。所以當時啲人話JPMorgan救BearStearns，其實係救自己。
第四，一定要危害到大眾市民每日嘅經濟活動。按揭、私人貸款、信用卡財務verygood。借錢畀甲級寫字樓發展商，冇咁有用。
AIG學以致用
根據以上四個教訓，如果你真係一個金融機構管理層，咁就要好好學習。因為已經有金融機構學以致用，佢就係AIG。
講真，AIG真係好似一個幼稚園老師，身上綁起炸藥，走入充滿小朋友嘅班房，用電話同世界各國嘅父母講數。大家應該有心理準備，政府唔救AIG，班小朋友會一鑊熟。
孫柏文
http://phatdat.blogspot.com