食家出口×名廚出手　滋油組合

近日銅鑼灣開了一家樓上新餐廳，主打新鮮即開生蠔，配上精選餐酒。餐牌上選擇不多，但菜式非常特別。看來似曾相識，但又有耳目一新的感覺，全憑兩位入廚高手：紀曉華出口，大廚恩哥出手，以慢煮滋味香油作西菜靈魂，創作出一道道新菜式。

記者：張一豪
攝影：梁細權

傳統設計，反傳統菜式

新餐廳名字喚作「D17」，店名極像家酒吧，位置在恆和鑽石大廈17樓，以「Diamond」的「D」加上樓層就變成店名，只是想給人簡單直接而「真」的感覺，正好配合餐廳希望建立的直接、追求真味的宗旨。
餐廳的設計兼餐牌顧問是集設計師、旅行家及食家於一身的Walter紀曉華，「今次搞呢間餐廳，歐陸味會比較重，有火爐、四方木枱同埋貴族椅，係想做一個法國家庭感覺，但我以灰色做主調，除咗想做畀人樸實感覺之外，亦要人感受到一啲悶悶嘅感覺，故意同我哋做嘅菜式造成對比。我哋會做一啲反轉傳統、追求食材真味嘅西餐，呢個亦係歐洲近年嘅飲食潮流。」Walter講的時候胸有成竹，但卻苦了他的拍檔及一群幕後廚師。

慢煮香油係靈魂

餐廳總廚是陸家恩師傅，入廚18年，除先後在酒店工作外，亦跟柴灣隱世廚神RickyCheung合作過，為LeMieuxBistro執行過不少菜式，「D17」是自立門戶之作，自然重視。「我淨係識暱埋喺廚房，所以今次搵Walter做餐牌顧問，因為佢去過好多地方，試過好多菜式，從佢喺世界各地嘅飲食經驗中，畀參考同靈感我，希望創新菜式可以打破悶局。
「每次創作都先由佢口述感覺，我再做出接近嘅菜式，每個菜往往要試十次八次，花咗唔少心思。呢度用來調味嘅慢煮香油，係新派西菜嘅靈魂，每種都係用三、四個鐘慢煮，一做就六、七種，用來配合唔同食材，香味柔和，除增加風味，又唔會喧賓奪主，令人可以食到食材嘅真味。而要令香油保持質素，一次最多只可以做3日左右份量，好煩。」9月新張期內，午市每位減$50，吃個午餐$70-$80就可以落樓，晚市每人消費超過$200就減$100，星期一、二晚開酒更有半價，非常有誠意。