無綫劇集《溏心風暴之家好月圓》令劇中各演員人氣急升，不過人紅自然多是非，其中楊怡更被指因內分泌失調而經期大亂，昨日她否認此事，更直言十分之正常。對於被指患上強迫症一事，她只當笑話一則，但就直認向來有鋪拖地癮減壓。
楊怡昨日於奧海城出席「越野慈善賽」活動，雖然有消息指她內分泌失調，更患上強迫症，但楊怡昨日出席活動期間，表現未見有任何異樣，她笑指看過報道上「強迫症」的標題，自己也忍不住笑了，對於被指月經大亂，她說：「我非常之正常，正常到睇到報道都覺得好笑。」
唔介意被降級
自言拍攝《溏心風暴之家好月圓》期間的確感到壓力，楊怡說：「佢哋仲影我喺屋企拖地，呢樣嘢我平時都會做，自己當做運動，除咗可以幫媽咪做家務之外亦都可以減壓。」
對於有消息指台慶頒獎禮改制，每劇最多只可提名三人角逐同一獎項，結果楊怡被迫轉戰最佳女配角，無緣角逐視后，她說：「我唔會諗太多，大家認同我已經好開心，越矜貴先會多人去爭，先會更多人去認同，咪等自己再做好啲囉。」
同樣因轉制而可能被降格選男配角的陳豪，雖然未能冧莊視帝，搵錢機會卻沒有停，今年更再接再厲擔任「史雲遜護髮中心」代言人，早前拍攝全新一輯廣告，其中一場於浴室梳洗的場面，鬼馬的陳豪更拿起花灑當咪，大展歌喉即引得工作人員大笑。
中秋收視插水
此外，《溏》劇上周劇情高潮迭起，本周進入尾聲衝刺，惜上周受到中秋節連續假期影響，在上周五收視明顯減少，黃金時段收視全面下跌，《溏》劇受拖累平均收視稍微下跌2點，流失約12萬觀眾，平均收視回落至34點收視（約213萬觀眾），至於向來有收視保證的《鐵甲無敵獎門人》跌幅最大，相比前周下跌7點，流失約44萬觀眾，平均只得23點收視（約144萬觀眾）。
採訪：王崇穎
攝影：林德雄