馬季開鑼，一如回歸後慣例，有香港特區行政長官盃（俗稱特首盃），在第四場（下午二時三十分）舉行。賽馬嘅盃賽，一般安排在第八或第九場舉行，盡量留住啲馬迷唔好咁快離場吖嘛，點解特首盃要在第四場呢。當然係曾特首係大忙人，時間有限，唔可以在馬場逗留太久，十二時前到場主持開鑼儀式，三點前頒完獎盃，啱啱夠鐘。特首出場，笑口常開，不時與馬迷握手、揮手，好輕鬆噃。咁好玩不如到多啲馬場吖！
馬會在正式開鑼前，九月十二日辦一個「冠軍人馬」晚會（NightofChampions），冠軍練馬師，冠軍騎師，董事等等參加，在金鐘香格里拉酒店舉行，情況熱鬧。於酒會時間，左丁山碰到前馬主協會會長，現傷健策騎協會會長KK，向佢恭喜殘奧馬術賽功德圓滿，雖然香港代表葉少康攞唔到獎牌，已為本地傷健策騎人士帶來希望，特別係睇到外國之嚴重「身障者」，如失明人、獨臂人、腦痙攣人等都能夠克服重重困難，騎上馬背，指揮馬匹做盛裝舞步，你話係唔係對本地「身障者」（日本語，非常貼切）嘅巨大鼓勵呢，譬如馬會行政總裁應家柏就提及用牙咬住韁繩之德國女選手，因馬匹偶然失控，要加大牙力拉動二十四磅之相等重量，直情係匪夷所思！
KK會長就話奧運馬術賽成功完成，香港好多人有功勞，仲順帶叫左丁山恭喜前一哥T添咗一個男孫。未搵到一哥T之前，眾多馬主一致認為香港辦馬術比賽，全國獨一無二，贏盡國際讚賞，皆因香港馬會不惜人力物力，盡量配合之故。但一眾馬主就覺得特區政府好唔公道，當足馬會係鍾無艷，有需要就叫馬會盡社會責任，到馬會要求增加多一兩場外國直播賽事，以供投注，特區政府就叫馬會收聲，即使係港鐵興建南區綫，跑馬地區居民要一個地鐵站，鄭汝樺都夠膽叫馬會畀錢十三億，當馬會係ATM機，何其荒謬也。
入席後，見到一哥T嘞，醒起會長KK之言，立即向佢恭喜T家又添一個男丁，一哥T笑到見牙唔見眼咁話：「乜你都知道㗎，計埋昨日出世呢個，我有三個孫嘞！」昨日出世？咪即係生於九一一，問清楚先？一哥T話：「事情係好巧合嘅，新抱預產期本係九月十三日，點知提早咗九月十一日就搶閘出生，嗰日就係我嘅生日！」爺孫皆在九一一出生，巧之又巧，恭喜恭喜一哥T。