轆Book：盧均宜羊　幪面超人上身

年初第一次見傑志球員盧均宜，淨係記得當日佢揸住電單車出場，係咁多。收風，話佢最近有部型爆戰車，心諗有幾型呀？忽然一個「巨頭」撲埋嚟，唔係嘛？超人戰車？仲要喺我面前變身？「超人」跳落車，揭開面罩，係盧均宜。佢一臉得戚話：「最緊要型。」佢啱，真係好型。

記者：黎頌詩
攝影：陳盛臣

「又換新車？乜名堂？」「盧均宜自家羊。」吓，咪又係年初見過嘅同一部電單車？點解硬係覺得唔同咗Feel？唯一解釋，係眼前人突然型咗，搞到我思路不清。好，回魂，一睇車頭嗰對好似鷹眼咁款嘅上揚頭燈，仲唔係SuzukiSkywave400s-Type？呢部電單車早被追捧成「最型仔大羊」，但盧均宜貪型，幫愛驅裝身，變身成𠵱家嘅自家羊。
裝身靈感何來？盧均宜話要刨書。「因為香港無呢啲配件，大部份都要由日本入口，所以要睇日本車書搵資訊。」變身後，原本嘅擋風玻璃變成不透明鬼面罩，左右兩邊又換上大大塊鯊魚鰓狀風刀，整合起嚟，原本已怒目橫瞪嘅頭燈更似一雙大眼睛，車頭十足一個巨頭，霸氣提升搶晒收視。講霸道，一副惡樣都及唔上車尾一條45度上揚嘅粗壯尾喉，極盡浮誇，搞到部座駕一副戰鬥Look，不過盧均宜竟然反高潮話：「揀SuzukiSkywave400s-Type只係因為貪佢夠大架，坐得舒服，飛車？唔啱我啦，我整到佢咁靚仔，一個唔小心翻車會好肉痛。」

■改裝後嘅車頭，十足十幪面超人。

惡Look得個樣

一句講晒，呢架自家羊純屬擺姿態，講到性能依然平易近人。「係呀，外表玩吓花臣，我已經好滿足㗎嘞。」的確SuzukiSkywave400s-Type本身就唔係戰車格局，399cc引擎、軸距1,585mm、10.5:1嘅壓縮比提供34匹馬力，扭力輸出比之前嘅版本強勁。車身大，負磅重，但3.5kgm扭力輸出，令起步依然迅速、行車穩定。雙環儀錶板中央有LCD顯示時間、里數同耗油等料，資料清晰齊全媲美四個轆嘅私家車。整體而言，設備齊全又易操控嘅Skywave400s-Type啱晒盧均宜呢亭擺明用作代步嘅車主要求。既然日揸夜揸，享受梗係一樣要升級，所以車身加電鍍裝飾兼添置咗五個喇叭，不過盧均宜話未夠喉：「仲有好多嘢想改。」原來齋玩變樣，都好有樂趣。