【溏心風暴之家好月圓第十九回鬥戲人辦】
結局倒數仲有3日--管家仔甘永好是《家好月圓》中的超級好仔，愛錫嫲嫲、孝順母親、照顧弟妹、捍衞家庭，奈何一直糾纏在于素秋（鍾嘉欣飾）、凌志信（黃宗澤飾）和詠琳（姚嘉妮飾）的四角戀。演管家仔的林峯直認好人難做，忠角難演，拍劇時確曾動真情戀上緋聞女友嘉欣，卻恨她「有事甘永好，冇事凌志信」，幸好管家仔義氣行頭撐到底，在愛情路上終於有個happyending。撰文：朱倬誼
在《溏心風暴之家好月圓》中，林峯飾演的管家仔以照顧家庭為己任，孝順長輩、疼錫兄弟姊妹就是他的天職，在愛情上又桄榔樹一條心，相信天下母親都渴望有個像管家仔這樣乖巧的兒子。管家仔備受媽咪觀眾喜愛，自然也帶挈林峯人氣急升。
婆媽固執 難演到痹
林峯說演管家仔不容易，有壓力，又要盡力，日前他接受訪問時說：「有壓力㗎，管家仔係一個好人，又要演得真實，我覺得好難演，好有難度，因為啲人會覺得有冇咁好呀？唔makesense嘅？好彩劇本合情理，角色都有缺點，有後生仔嘅衝動同固執，都會做錯嘢，唔係一味對人好。」
另一壓力，是劇中老戲骨太多，林峯要打醒十二分精神，他說：「呢套劇太多前輩，我對自己好有要求，如果交唔到功課，做唔好自己本份，除咗對唔住自己，仲對唔住所有人。我知道大家好關注呢套劇，所以台前幕後好出力去做，自己都算做足功課，包括為自己角色定位。其實後20集先係我主線，頭20集係講管家仔嘅性格，永遠屋企有乜事，佢都係第一個企出嚟，唔希望屋企嘈喧巴閉，最希望屋企團圓，細佬妹同阿哥生生性性。人如其名，管家仔，乜都管，又要加少少婆媽性格，所以好難演，又驚婆媽畀人覺得好煩，同埋唔可以關心屋企人，關心到唔理是非黑白，好人係好難形象化㗎。」
鍾嘉欣扮演的于素秋跟林峯青梅竹馬，同時間又與黃宗澤飾演的醫生凌志信愛得深，加上凌志信已有女友，糾纏在這段四角關係中的管家仔雖曾退出，但始終不捨心中最愛，林峯說：「嘉欣同宗澤喺劇中離離合合唔知幾多次，嘉欣次次搵我攝時間，但我又肯陪佢，管家仔對佢係有愛意，但界定咗佢係阿妹，唯一做到嘅係佢唔開心我咪安慰佢，都算有義氣。呢條感情線好複雜，好多事發生，總之有事甘永好，冇事凌至信，但最後都係大團圓結局嘅。」
琴姐出色 加拍戲份
林峯和鍾嘉欣因合演此劇而傳緋聞，林峯直認拍戲時確動了真情：「拍戲時需要嘅，如果唔係點投入啫？但我好易抽離，演員嚟㗎嘛。我哋係好朋友，覺得嘉欣係一個好可愛嘅女仔。」
不過管家仔的賣點還是孝順最有睇頭，嫲嫲（李香琴飾）對他錫到燶，開口埋口管家仔，管家仔也最識冧嫲嫲，陪她四處走又陪她耍太極。林峯爆琴姐好戲，故戲份越加越多，他說：「嫲嫲呢條線太好睇，係咁不停加戲，琴姐好犀利，精力好旺盛，見佢凌晨3、4點仲開緊工，但佢拍得開心，因為角色有戲做。」
林峯和琴姐、荷媽李司棋、Sa姨關菊英和Jo飽夏雨等對手戲甚多，他形容與這班前輩拍戲，等同袋錢落袋，今次他簡直賺個盤滿缽滿，他說：「我哋喺現場太多嘢偷師啦，我睇到佢哋嘅專業，無論take幾多take都可以keep到，保持水準同穩定性，呢個就係經驗問題。」
攝影：黃偉雄 協力：黎敏茵
化妝：RaymondYipofMaeVon
服裝：TedBaker 場地：ithai
搶先爆：素秋見親父最後一面
《溏心風暴之家好月圓》今晚播映第36集，劇情講述面油王（李國麟飾）為見親生女素秋（鍾嘉欣飾），經常跟蹤她，管家仔（林峯飾）為保護素秋反跟蹤面油王，發現面油王只是住在簡陋的旅舍，未有收過紅姨（米雪飾）任何好處。
面油王患末期癌病入院，素秋趕往醫院見父親最後一面，面油王臨終前希望得到素秋原諒，不過素秋只是以安慰病人的態度點頭示意原諒他。管家仔陪伴素秋度過不愉快的日子，感情與日俱增，最後衝破障礙，一個白頭到老的蛋糕，讓兩人的心事盡在不言中，並開始發展男女之情。
另外，阿卡（陳豪飾）發現有隱性心臟病後，從此害怕熄燈，阿月（楊怡飾）得知此事，擔心得哭成淚人。
《溏人心聲》
最愛劇中金句--「唔使驚，荷媽喺大廳！」
管家仔最黐家人，所以林峯對這句話印象最深：「我喺戲中同荷媽係一家人，呢句最常講，幾有親切感。」
自選最愛場面--嫲孫攬住喊
林峯的家庭線很重，飾演他嫲嫲的李香琴雖曾一度惡死能登，但畢竟最愛一班乖孫，管家仔最識冧嫲嫲，所以林峯超愛劇中的嫲孫情，他說：「有場戲講嫲嫲擔心我嘅感情事，我又知嫲嫲嘅心事，我哋攬住喊，互相安慰，呢場戲好touching。」
表現最好演員--楊怡有進步
林峯揀飾演「攞女」阿月的楊怡最出眾，他說：「我識咗阿怡10年，好熟悉佢嘅演戲方式，佢今次畀我覺得更進一步，將角色發揮得好好，做到硬淨feel同委屈，但又夠婆仔。」